من وعيت على هالدنيا وبكل عيد ميلاد كيكتي تختارها امي الله يرحمها لي من العالمية .. زمان العالمية كان غير هالمحل كان ابوو الكشخه حزت الثمانينات هالكيك الطيب اللي على شخصيات مرسومة بالكريمه الملونه 🙂 اي ليزر اي بطيخ كانت فرحتنا بالكيك ما بعدها فرحه نلطخ ويوهنا بهالكريمه السنعه ونتلذذ بالكيك اللي ما كان يبقى منه شي بالعيد ميلاد مو الحين احلى وارقى كيك وناكل منه قطيعه والباجي بالثلاجه ولا للخدام اللهم لك الحمد 

شوفوا كيك العالمية بذمتكم موو ناطع يا زينه 😀 

امس كنت ماره صالون كرستال مادحين لي وحده تقص شعر عندهم وجان القى محل العالمية بنفس مكانه ومبطل يا حلــــوة 🙂

اصلا طول ما انا بالصالون بس كنت انطر اخلص وادخل اشوف شنو اللي ليلحين يبيعونه واصورلي جم صوره ذكرى لي وبوست تذكير فيه لكم 😛

يا حلو زمان الطيبين والله نفس طريقة الحلويات ونفس طريقة العرض بس الفرق اول كان الزباين من كثرهم واقفين عند الباب والحين مع التطور وكثره المحلات نسينا هالمحل الطيب

الكيك ليلحين موجود والبيتي فور والنواشف وغيرها

يحليلها البلاك فورست اهي اهي بس جنها صغرت شوي شوفوا الصورة اللي فوق وقارنوا 😛 

هذا الكيك ولا بلاش كيوووت الارنوب

البيتي فور رااااهي شحلاته

خذيت منهم هالكيك عجيييييب وترف مشاء الله مع الحليبه شي ماصار 

شي واحد ضيق خلقي بهالزياره انه البايع قالي انهم خلاص بيسكرون واحتمال يفتحونه بمكان ثاني 🙁 

قلتله لا حرام المكان انعرف هني بالسالمية من السبعينات والثمانينات ولو بتفتحون بمكان ثاني بتكون العالمية مو عالمية 🙁 انتوا شرايكم ؟؟