تعرفنا على مطعم همبه من خلال تنقله بكذا موقع من خلال سياره خاصه سواء بالمعارض او الحفلات الخاصة وسبق اني كتبت عنه بوست (اضغط هنــا) .. اما اليوم كان الوضع غير 🙂 لأنه زيارتي كانت لمكانهم اليديد الثابت في الشويخ الصناعية – شارع الزينه – اللفة اللي بعد كي دي دي بجانب مطعم الكلحه
سيتم الافتتاح اليوم السبت 23/6 الساعه 4 الى الساعه 12 مساءاً
خلونا نتعرف اكثر على همبه وعايلته .. همبه اهو كاركتر خاص بالمطعم يحب الاكل والبرجر وعنده عايلة مكونه من امه وابوه واخته متينه ورفيجة اخته اللي تحب الحكوكة وولد اخوه بوتمبه
فكره ظريفه خصوصاً انه كل كاركتر له نوع من البرجر خاص فيه 🙂
في تجربتي السابقة كان المنيو وايد محدود لكن هالمره كان في اكثر من نوع للبرجر اللي تحمل اسماء الكاركترز وهم اسماء اخرى مثل جريلد باك وذي تويت وامجكنم
من الاشياء اللي بتستمتعون فيها في همبه وجود ايباد تقدرون من خلاله تختارون الاغنية اللي تبون تسمعونها
وصلت طلباتنا
همبرجر بوتمبه ومكوناتها البرجر طبعا مع حلقات البصل, بيكون, جبن, خس, مخلل وطماط وصلصة همبه الخاصة
اما البرجر اللي كان لازم نجربها كانت حكَوكة !! صج صج حكَوكة لأن البن لونها اسوووَد
اما مكوناتها فجبن وخس وطماط مع البصل وصلصة همبه
عجييييييييييييييبه وايد حبيتها ولازم تجربونها
فرايز مع صلصة همبه
حلوه لوحة التوقيعات على شكل همبرجر بمحتوياتها 🙂
كل الشكر للسيد مبارك الصباح صاحب مطعم همبه على الدعوه وحسن الضيافه وموفقين يارب
Tel : 24911115
