كانتين !

مطعم كانتين من المطاعم اليديده اللي فتحت في حديقة الشهيد وتابع حق مطعم البرجر المشهور بروذرز

القعده بره عجيب بس يبيلها يبرد الجو اكثر تكون اروع


الديكور داخل المطعم وااايد حلو حبيت الاجواء وحركة الفاكهه على الطاولات وحتى طريقه الطلب نفس مطاعم بره توقفون بالدور تطلبون وتاخذون تاق تحطونه على طاولتكم ويوصلكم الاكل


المنيو


طريقة عرض بعض المعجنات تشوق ومتفننين بالكرواسون 

روز وجوكليت وبيكان وزعتر وجبن وغيرها


السلطات معروضين وتختارون اللي تبون


سلطة البيديان اتينن چنها فته نااااطعه


Funghi gigante​

بورتابيلو مشروم مع جبنة براتا فريش لذيذه مع شبس الشمندر وصلصة اعشاب 

اتينن وايد عجبتني


باو الدجاج

دياي مقلي مع الملفوف والبصل المكرمل والصوص في خبز الباو

هذي بعد شي خطير


B B Burger​

برجر مع البصل والخس والبيكن وجبن الشيدر والمايو والكتشب والبصل المكرمل وصلصه خاصه

مع فرايز البطاطا الحلوه


برجر الدياي مع البصل والطماط والخس وجبنة الغودا والمايو والماسترد


Balle​

جوكليت بومب مع الايس كريم والجوكليت موس

ماحبيتها وايد ثقيله وغنيه


كانتين في حديقة الشهيد مقابل المسجد

Instagram : @canteen_kwt 

مكياج السفر 


مع اني مو خبيرة بالمكياج ولا احب المكياج الكثير ولا احط مكياج يومياً لكن بالسفر اخذ معاي شنطه صغيره للمكياج طبعاً للصور ههههه لازم شوي الواحد متعدل 

بعض البنات لما احط صور ليومياتي بالسناب يسألوني عن بعض المنتجات فقلت الخص اشيائي البسيطه بموضوع في المدونه 

طبعاً بالنسبه لي اخذ الاشياء المهمه فقط 

اول شي افضل اخذ معاي بالسفر بي بي او سي سي كريم يكون خفيف وفيه نسبة حماية 

سماش بوكس سي سي كريم اينن ثابت ويعطي تغطيه جيده وبالنسبه للون بشرتي انا اخذ ميديم

وحتى الباودر ما استغنى عن سماش بوكس كل مايخلص لازم اشتري نفسه وساعات وايد القاه مقطوع من السوق فكل ماحصلته اخذ اكثر من علبه احتفظ فيهم 

عندهم درجات كثيره لمختلف الوان البشره


الكونسيلر جربت انواع جيده لكن صارلي فتره استخدم كونسيلر بسام فتوح اينن اينن اينن واصلاً مو منزل الا درجتين بس عجيييييب وايد حبيته وهذا ثاني كونسيلر اشتريه بعد ماخلص الاولاني تغطيته حلوه وايد ومخملي مايتبارق 


الشدو اللي احتاجه وقت السفر بنيات خفيفه وبيج موجود في باليت نيكد٢ الصغير مال السفر وتحصلونه بارفف سيڤورا صوب الكاشيرات 

وما استغنى عن هالفرشه من توب شوب ماخذتها من سنتين بس تهبل 


حق تحت العين لازم شدو اسود واحب سواد شدو بوبي براون وفرشة ماك ٢٣١ اتينن عجيبه 


الحواجب ماكو على سماش بوكس بعد هذا شي اجرب اجرب ومردني له خصوصاً اني احب ارسم بالباودر مو الاقلام وبودرته ثابته وسهله وعندهم اكثر من درجه

اما الفرشه هذي حبيبتي ٢٠٨ من ماك شي خيال للحواجب لا تقولون انستازيا ولا غيرها هذي وبس


هالاي لاينر من سينز يهبل للي مو ذاك الزود بالرسم خطه ضعيف وتتحكمين فيه بزوايا العين خصوصاً

انا خذيته من ريد تاق بالري بس اعتقد كومار وشنكر وربوعهم والمباركيه عندهم لانهم يبيعون هالماركة الحين 


الماسكرا احط خطوتين اول شي برايمر بنفيت لونه بني تقدرون تستخدمونه برايمر او ماسكرا بنيه المميز فيه انه يعطي مده اطول للرمش بالثبات انا احطه واحط فوق الماسكرا الورديه من سينز تهبل وتعطي الرموش طول وكثافه وسوااااد وتحصلونها الحين عند البياعين اللي ايون البيت والمباركيه وريد تاق وسيڤكو 


كحل بيج داخل العين احب شارلوت تيلبوري البيج عندها عجيب وواضح ويسحب

الماركة موجوده بلندن وتقدرون تطلبونها من نت ابورتيه يوصلون لي الكويت


البلشر هم سماش بوكس هههه احبها هالماركة وايد 

لونه خطير ويناسب الجميع اسمه ​

HeartBreak​

والفرشه ماخذتها من ايسينج بالافنيوز


الاضاءه المميزه من ذا بالم اسمها ماري لو ومشهوره ماعتقد اكو احد مايعرفها من كثر ما اهي جميله ومتكلمين فيها


بالسفر ما احتاج اكثر من حمره ومحدد وغالباً اكتفي بمحدد ماك (سور) لونه جميل حتى بدون حمره فوقه وانا احط فوقه قلوس ديور فيه لمعه خفيفه مع لون وردي خفيف جداً يعطيه شكل احلى 


وبالاخير ما استغنى عن الفكس بلس من ماك وفي ناس يحبون برايمر ووتر من سماش بوكس او الفكس من ميك اب فور ايفر كلهم يعطون نفس النتايج بتثبيت المكياج فتره اطول بس انا احب فكس بلس ماك احسه منعش ويعطي لمعه طبيعيه والافضل بينهم

وفي ناس تستخدمه على فرشه المكياج لتثبيت لون الشدو والاي لاينر جل


وبالاخير اكيد المكياج ذوق شخصي وكل وحده تاخذ الشي اللي يناسبها بسفرتها بس حطيت الموضوع للافاده وللي ذوقهم يشبه ذوقي بالمكياج الخفيف للسفر

قرية ايفوار الفرنسية .. Yvoire

Yvoire1 ايفوار الفرنسية من القرى الجميله اللي زرتها بسفرتي الاخيره

ايفوار قريه تطل على بحيرة ليمان وبينها وبين جنيف ٤٠ دقيقه تقريبا بالسياره
وهم تقدرون توصلون لها من خلال الرحلات البحريه و الباص

صنفوها انها من ضمن اجمل القرى الفرنسيه لانها مميزه بورودها وطرقها وقلعتها وحديقتها بعد

فيها اكثر من فندق ومطاعمها وايد بعد والاغلب بحري كونها معروفه بقرية الصيادين

ومعروفه ايضاً ببيع الصابون المصنوع يدوياً
Yvoire2 اول ماتوصلون في مكتب سياحي تقدرون تاخذون منه خريطة القريه وهم مكرم السامع الحمامات موجوده يمه
وبالنسبه للي يايين بسياره في مواقع قربيه من بوابه العبور للوصول للقريه بس ديروا بالكم من طريقة الدفع لانها غير عن طريقتنا بالدول الخليجيه
لازم يكون كرت دخول الموقف بجيبكم بحيث اول ماتخلصون زيارتكم للقريه تدخلونه للمكينه الموجوده بجانب المواقف ويكون حاسب لكم جم قعدتوا ويعطيكم المبلغ اللي المفروض تدفعونه وبعد ماتحطون الخرده يرد لكم الكرت ولما تركبون السياره يكون في جهاز يم مكان الخروج تحطون الكرت ويفتح لكم

هذي بعض الصور لقرية ايفوار
Yvoire3
Yvoire4
Yvoire6
Yvoire13

هالتمثال لاحد المحلات في القريه مشهور وايد وكل زوار القريه لازم يصورونها
Yvoire5 البحيره
Yvoire7
Yvoire8 اخترنا احد المطاعم اللي مادحينها في برنامج تريب ادفايزر
Le Bateau lvre اسمه
Yvoire9
Yvoire10 سلطتهم لذيذه
وستيكم طيب
Yvoire11
Yvoire12 محلات السيفونيرات بكل مكان
ومحلات تبيع مشغولات يدويه خشبيه وحتى صوفيه جلديه
Yvoire14
Yvoire16 كيوت
Yvoire15 قريه تستحق الزياره

Review : Funky Chocolate Club .. Interlaken 

قبل السفر واثناء البحث عن اماكن نزورها في انترلاكن شفت الكثير من العرب كاتبين عن هالمكان

فنكي چوكليت كلوب 

محل خاص للشوكولاته ويسوي وورك شوب 

لازم تحجزون عن طريق موقعهم بالانترنت ىهذا اللي بتكلم عنه 

جربت احجز عن طريق موقعهم من خلال الايفون لكن كان صعب ومايكمل الموضوع فدخلت من الاب توب وشفت المواعيد واخترت اليوم وموعد الوورك شوب اللي تناسبنا وكملت الحجز بطريقه سلسه الى ان وصلت الى صفحة الدفع !!! 

دفعت وبعدها قلبت الصفحه بيضا :(​

وتم خصم المبلغ من حسابي الماستر .. فخذيت كابجر واحتفظت فيه بتلفوني وقلت خلاص دام انخصم فاكيد الحجز موجود .. جربت اكلمهم بالدايركت بالانستغرام لكن ماردوا على الرساله ولا شافوها وطاف 

 اليوم كان الموعد الساعه ٢ ورحت لهم بالموعد بالضبط 

لكن مع الاسف كان اسمي موجود عندهم بالسيستم لكن الموعد ملغي فتأكدت من بطاقتي الماستر واعتذرت بعد ماعرفت انه لاب توبي ماك والظاهر في خلل بالحجز من موقعهم لمستخدمي ماك وقالت مع الاسف وورك شوب الساعه ٢ فل اذا تقدرون في مكان فاضي الساعه ٤ فوافقت 

قدموا لنا هالسويت اعتذار عن الخربطه اللي صارت


هذا المحل من داخل وصور لبعض قطع الككاو 


والساعه ٤ رجعنا عندهم وقالوا لنا تفضلوا 

في غرفه تقدرون تعلقون فيها اغراضكم علشان تكونون مرتاحين وقت الشغل

وبعدين تغسلون ايدكم وتوقفون على مكانكم بالطاوله 


كل شخص جدامه مريول نايلون وقبعه قماش يلبسهم 


وبدا الشرح بمعلومات عن الككاو ومن وين وشنو مميزاته وفوايده وغيره

وقدمولنا نبتة الككاو نجربها


وبعدها ٥ انواع مختلفه من الككاو بين الدارك والككاو بالحليب والككاو الابيض

تخيلوا جربنا قطع ١٠٠٪‏ ككاو مافيها لا سكر ولا حليب



خيرونا بين الميلك جوكلت او الدارك

بالنسبه لي اخترت الدارك


وعلمتنا شلون الطريقة اللي نخلط فيها الككاو الذايب مع ١٠ قطع من الككاو اللي اخترناه وبعدها تأكدت من حرارة الككاو عند كل شخص لانه لازم يكون بدرجه حراره معينه علشان مايصير عليه الترسبات الدهنيه البيضا 


بعد الخلط حطيناهم في البيبينق باق وقصيناه من تحت شوي وبدينا نفرغ في اللوح 



عطونا اوراق خاصه مطبوعه نختار منهم 


وبدينا الشغل بالالواح 


بعد الاوراق يابولنا التوبينق حلاو ومكسرات وجوز هند وسكر نبات وغيره


وهذا شغلي :)​


طبعا ياخذونه يحطونه بالثلاجه وتستلمونه بعد ساعه على الاقل

ويعطونكم شهاده


وبعد تحطون دبوس على ديرتكم انكم زرتوا المكان

وماشاء الله الكويت والسعوديه مايبينون غصب دعست دبوسي


وبعد الوقفه ساعه كامله نعابل بالككاو شريتلي قهوه بارده تسرسح 


تجربه حلوه والستاف يتكلمون انجليزي بطلاقه وحبوبين لازم تروحون اذا مريتوا انترلاكن ​

موقعهم اضغط هنا

Hotel Metropole .. Geneve

صايره شوي كسلانه عن البوستات خصوصاً اذا كانت بوستات سفر وصور وايد فقلت اكتب لكم الاشياء المهمه علشان اذا رديت الكويت ما اتكيسل

وايد سويت سيرج عن الفنادق قبل السفر وفيه ناس ماشاء الله مسوين تقارير بس مو الكل يفصل بالصور خصوصا بالنسبه للفنادق

انا يهمني اشوف صور الفنادق اللي مصورينها الاوادم اكثر من الصور الموجوده في سايتات الفنادق ومواقع الحجز 

علشان جذي قلت احط صور فندقنا وافيد غيري

السكن كان في فندق ميتروبول جنيف ٥ نجوم 

اول مره اسكن فيه بس ممتاز وموقعه عجيب وعريق

بوسط السوق تنزلون سيدا جدامكم بوتيك برادا وهم يطل على البحيره وساعة جنيف المشهوره


لما تسوون الجيك ان يعطونكم كرتين للمواصلات من خلالهم تقدرون تستخدمون الترام والمواصلات البحريه خلال المده اللي تسكنون فيها


والانترنت مجاني وهذا المهم 🙂

هذي الغرفه


الفيو


وديرة الككاو ضيافتهم ككاو لذيذ 


اللي عنده سياره مع الاسف الفندق ماعنده باركنج مجاني فياخذ منكم سعر الفاليه وهالشي باغلب الفنادق بسويسرا وفرنسا بعد 

والتلفزيون اغلب القنوات العربيه موجوده شغل عدل للي مايستغنون عن التلفزيون 

حجزنا كان عن طريق مكتب سفريات لاني ماحب مواقع النت والدفع المتأخر فأدفع زياده وانا مرتاحه افضل مع العلم ترى في ضرايب اضافيه تدفعونها عند الجيك ان 

موقع الفندق – اضغط هنا

منتجع اكوامارين 

الاسبوع اللي طاف قضينا الويك اند في منتجع اكوامارين في النويصيب

المنتجع يديد وفاتح شهر ١٢ اللي فات يعني صارله ٩ شهور بس فقلنا نجربه


حجز الوالد الشاليه الكبير اللي على البحر مباشره وعباره عن ٤ غرف نوم ومكرم السامع ٣ حمامات اضافه لغرفه وحمام للخدامه والصاله وغرفة الطعام والمطبخ

انا كتبت التقرير لانه المكان وايد ناس مايعرفونه ولانه تجربه لازم تنذكر فيها الايجابيات والسلبيات علشان القراء يستفيدون 

اول شي دخول المنتجع كان سهل والمفروض كان الدخول لسيارتين واسمحوا لنا ندخل الثالثه 

ماطولنا باستلام مفتاح الشاليه والتچييك عليه وعلى الاغراض اللي بالمطبخ 

u الشاليهات على حرف ال

صفتين وبينهم حمامات السباحه للكبار والصغار وترامبولين وشفت نطاطيات بس مو تافخينهم


وهذا شكل الشاليهات اللي على البحر 


خلوني اراويكم الشاليه من داخل 

الصاله

واهم شي حاطين قنفات يلد علشان ماينتلفون وللامانه مريحين


طاولة الاكل ل٦ اشخاص


طاوله اضافيه ويوفرون ايضا طاوله بلاستك مع كراسيها للتراس


المطبخ


وفوق هذي شكل الغرف 

وحده ماستر مع حمامها و٣ عاديين


غرفة الخادمه


البحر عندهم عجيب اول شي حد يعني مستوى واحد مافيه غزر زايد وثاني شي نظييييييف والرمل املس ماشاء الله

طبعاً ماكو قواقع وصخور وحتى سمج ماشفنا كونه حد


شوفوا الرمل شلون نظيف


من العيوب اللي لازم تنذكر دوشات الماي للشاطيء !!!!

شلون دش وتالي تطب بالرمل !! مو المفروض وجود عازل خشبي او اسمنتي الواحد يمشي عليه علشان مايتدمر عقب ماينظف عمره من الرمل !؟ 

ياريت الاداره تنظر بهالسالفه لانه بالتالي شاليهاتهم اهي اللي بتروح فيها من الرمل والطين


من الخدمات الجيده وجود حمام سباحه للسيدات لكن حسافه بدون اي خدمات تذكر ومافيه عمق نهائيا حسيته حمام سباحة اطفال 


المنتجع فيه مطعم بافلوز ومطعم الفرية الكويتي وسوبرماركت صغير


تأجير قواري


الشي السلبي اللي كلش ماحبيته كون المنتجع بعيد وايد عند الحدود ومن مشرف لي نويصيب ساعه تقريباً المفروض الاداره تزيد الخدمات وتكون كريمه على الرواد علشان تكسبهم لكن مع الاسف في شاليهنا سيرفس الاتصالات كان معدوم وتلفوناتنا ماتشتغل ولما كلمنا الاداره وقلنالهم عن الانترنت قالوا غير مجاني وب٥ دنانير اليوم للشخص ! مع العلم عند التسجيل قايلين لنا مجاني ! 

تعرفون فجأة لما تنقطعون عن العالم لا تلفون ولا نت ! ضيم وحتى تلفون الشاليه مافيه اتصال خارج المنتجع !!! ولما كلمنا المدير عن هالمشكله قال هذا الموجود !! 

الشي الثاني الچوله او البوتغاز كهربائي بس حرارته ضعيفه جدا جدا يعني علشان تقلون بيضه مثلاً  يبيلكم ساعه كامله يمكن فشلون على اللي بيطبخون غداهم ؟ بلشه 

والشي الثالث ماعندهم تأجير جت سكي وبنانا وسوالف الوناسه هذي اللي يحبونها الاوادم 

هذي باختصار تجربتي للاستفاده

اكوامارين في النويصيب 

Tel : 22322233 ​

Instagram @aquamarineresorts

Page 3 of 69912345...102030...Last »