عيد الفطر ٢٠٢٠ وكورونا

اول شي عيدكم مبارك وعساكم من عوادة يالغاليين

من زمان ماكتبت بوست وهامله البلوق وايد

ولهت عليه وعلى الفضفضه والسوالف وكومنتاتكم

عيدنا هالسنه غير مع جائحة الكورونا الحمدلله على كل حال والحمدلله على نعمة التلفون اللي نقدر من خلاله نشوف اهلنا وحبايبنا 💔

فقدت خواتي الله يحفظهم وعيالهم ودخلتهم علينا فقدت حبيبتي خالتي نوره اللي كل عيد اول وحده نعايدها وننطر اهلنا وحبايبنا عندها وفقدت بيت بيان بالليل ولويتنا وحتى سيستم كل عيد والمسرحيات فقدتهم

صج المساجد مسكره بس ربي لك الحمد صوت تكبيرات العيد تشرح الصدر وياربي لا تطولها شدة وتفتح مساجد رب العالمين وتستقبل المصلين عاجل غير آجل يارب

اما العيادي فقبل الحظر الكلي عيال اختي الكبار كانوا عندي واستلموهم اما العنونين فسهمهم محفوظ ليما اشوفهم وابوسهم وكشخه هالسنه الارض طالبتهم طلبيه من بريدة وصلوا بالDhl ههههه

وبما ان النومة كانت ولازالت معفوسه طول رمضان وقالبين الليل نهار والعكس دخلت المطبخ الفجر واول مره من سنين اسوي قرص عقيلي خبري اول اسويه مع امي الله يرحمها كمساعده بس .. المهم طلع زوين يابس شوي بس ماشي حاله كتجربه اولى اهم سويت شي لريوق العيد ههههه

انتوا شسويتوا بالعيد ؟ وشنو ولهتوا عليه ؟

2 comments

  1. Om fa9oli says:

    الف الحمدلله والشكر لله لبسنا ملابس جديده من الكبت وجهزنا غدا العيد والحلو والقهوة وعايدنا احبابنا بالتلفون والعيديه ارسلتها عن طريق موقع عيديتي

  2. ام عبدالله says:

    الحمدلله تحنينا ولبسنا لبس العيد ولبسنا ذهبنا وسوينا ريوق العيد ودقينا على كل اهلنا فيديو وعايدانهم واهم شي ان الجميع بصحه وعافيه بس فاقدين اللمه الحلوه ويارب نجتمع قريب

Leave a Reply to Om fa9oli Cancel reply