Fatoma’s Baby Shower !

babyshf1 الاسبوع اللي طاف كان عيدميلاد اختي فطومه وهم ولادتها قربت ربي يسهل عليها فقلنا نسوي بيبي شاور صغير ونحتفل بعيدميلادها مره وحده
نزلت صور وفيديو على اكاونت البلوق في سناب جات
ووايد ياتني اسئلة واستفسارات
وحتى وانا ادور فناتق للبيبي شاور اللي فادني المواقع الاجنبيه فقط كون هالشي مستحدث عندنا
فقلت احط بوست كامل مع التفاصيل علشان يستفيد الجميع

ونبدا من اول شي
مكرم السامع الدواسه خذيتها من مركز سلطان السالميه
وحطيناها عند باب المدخل
babyshf2 في اشياء حسافه ما صورتهم الا فيديو وما انتبهت انه ماكو صور الا الحين لما كتبت البوست 🙁
الباب من بره زيناه في بانر ومن داخل علقنا عليه هدوم عنونه للبيبي ودلاقات واستخدمنا المشابك ملوت الغسيل للتعليق
من ضمن اللي علقتهم كبابيس صغار خذيتهم من سوق شعبي بالري اسمه قصر السلطان مكتوب عليهم عبارات بحبك يا ماما و بحبك يا بابا وغيرها

اما الكيكه فكانت على شكل بطن الحامل وطبعة المولود
خذيناها من هالاكاونت بالانستغرام
@Cake_Artist
babyshf3 كيكة عيدالميلاد عباره عن لوتس كرسبي عجيبه ولذيذذذذذه
من هالاكاونت
@Nena_sweets_kw
babyshf4 الجياس خذيتهم من محل لابوسا في برج جاسم السرداب
وحطيت داخلهم كوكيز وزينتهم بستيكرات شريتهم من لاكشيت بحولي
وحطيت على كل جيس اسم الحاضرين
babyshf5 الماي والڤيمتو النونو وشعر البنات والنفيش وجياس مكسرات وسويت بچارز وجيلي ولوحات صغيره للمناسبه مع بانر
من هالاكاونت
@_party_box_
babyshf6
babyshf7 هالفريم سويته عند محل يديد في الشويخ متخصص في مستلزمات الحفلات
اسمه بارتي بوكس في شارع التمور
صممولي اياه على حسب طلبي والجمله اللي ابيها
وخلصوها بالموعد
طلبوها من ياسر وايد محترم وشغله مضبوط

وهم خذيت منها بانرات وبعض الالعاب الخاصه بالبيبي شاور بصراحه عندهم تشكيله كبيره وحلوه لهالمناسبه للبنات والاولاد
babyshf8 وهذي الهدايا حطيناها على جنب
البوكس اللي مكتوب عليه هابي بيرثداي سويته عند نفس المحل اللي بشويخ
babyshf9 Mom to be
شريته من نفس المحل اللي في برج جاسم ولبسناها اول مادخلت البيت
babyshf10 الحين نيي للالعاب
بصراحه اسهل شي كان في بالي اني اسوي سيرج واشوه لقيت جم شغله بمواقع اجنبيه استفدت منهم وحولتهم عربي 🙂
وفي العاب شريتهم جاهزين من محل بارتي بوكس

اول شي دورت رسمه لصورة وحده بتولد ههههه وحطيت فوقها مكان يكتبون فيه تعليق يضحك
واخر شي الحامل اهي اللي تنقي التعليق الفايز
ابداعاااات
babyshf11 مسابقة الحفاظات هههه
شريت اوراق كريشه وجلاليب كبار
واحسن وحده تسوي حفاظه مرتبه تفوز
babyshf12 لعبة حفاظات الحظ شريتها من بارتي بوكس
كلهم فاضين من داخل الا وحده فيها ………
لووووووول
طبعا اللي لقت هالشي فازت
babyshf13

لعبة المصاصه
هم من بارتي بوكس
بانر على ياهل ومعاها مصاصه لازم تغطون عين اللي بتلعب وتشوفون وين تحط المصاصه
اللي تحطها على حلج الياهل تفوز
babyshf14
كل واحد ياخذ ورقه ويكتب الاغراض اللي احتمال تكون شرتها الام قبل ولادة الياهل
وعاد الام تشوف الاوراق وتصحح هههههه
واللي كتب اكثر اغراض صح يفوز
babyshf15 لعبة الطين بعد ونيسه بس يبيلها فنانات 🙂
والام تحدد الفايز
babyshf16
babyshf17 سوينا بعد لعبة ممية الحلاو بس حسابه نسيت اصورها
مميه موجوده بالجمعيات فيها حلاو بودر
اسرع واحد يخلصها له هديه ههههه مساكين انغثوا

والحين من سكتش الام
احسن واحد يرسم فطومه يفوز
🙂
هالصوره طلعتها من النت وطبعتها جاهزه
babyshf21 بدعوا البنات بالرسم
babyshf19
babyshf20 وهالامنيات حق البيبي 🙂
وهم ما نخلص من الابداع والاشياء اللي تضحك
babyshf18 الاكل كان كيتيرينج صاج حده عجيب
@house_party_q8
ماشاء الله صاجهم خفيف وحشواته متنوعه ونظاف ومرتبين
babyshf23 طبعاً فكره الفريم اللي سويته فوق كانت لاني حاطه في بالي اسوي شغله للذكرى نفس الايفنتات اللي كنا نحضرها
فجهزت البوكت برنتر اللي كنت كاتبه عنها من قبل بوست وتطبع الصور من التلفون سيدا
وجهزت فريمات ورق مقوى هم لقيتها في الانترنت لكني ضفت لها لمساتي مثل الياهل والكلام
وحددت حجم المكان الفاضي علشان اقدر الزق فيه الصوره اللي باخذها للبنات 🙂
وكان بهالشكل
babyshf22 وهالبالونات خذيتهم من سوق قصر السلطان ووديتهم محل العاب تفخوهم لي وزينوهم بالشرايط ووزعتهم في البيت
واخر الحفله فطومه طيرتهم بالسما 🙂
babyshf24 الله يسهل عليج يا وخيتي ويرزقج بالطفل الكامل السليم المعافى ويجعله من الذريه الصالحه يارب