من فترة خاطري اغير لون شعري مليت من لونه الطبيعي (بني غامج) قبل فترة سمعت وايد ناس مدحولي وحده ورحت عندها وانلطعت ٨ ساعات تحوس بكشتي واخر شي تخيلوا نفس لون شعري بس زادته خصل زيتيه خفيفه تلوع الجبد وب٨٠ دك تصدقون ليلحين محتره ههههه بس مو على الفلوس على وقتي اللي ضيعته عندها وكشتي اللي لعبت فيها
المهم بما انه عندي مناسبه قريبه بإذن الله قلت اغير لون الكشه ههههه وسألت الفولورز عندي بانستغرام وماقصروا حبايبي مدحولي صالونات وايد شي دقيت عليهم فل وشي اللي مادحينها مسافره والله كتب انه تكون صبغتي عند صالون تربل في السرة عند مدام هيام
طلعت من الدوام ومريتها بال٢ يحليلها نفسها حلوة وتسولف راويتها صوره لصبغة عاجبتني وبعدها شافت شعري چان تقول هاللون حاليا بالحلم 🙁 ليش يا مدام هيام ليش تكسرين بخاطري لكن احترمت فيها صدقها من اول شي قالت لي ماراح يطلع اللون اللي تبينه لانه شعرج وايد غامج وتعبان واذا تبين هاللون لازم نسحب اللون وهالشي يتعب الشعر وماراح اسويه !
قلتلها انزين شتقدرين تسوين ؟ طلعت لي الوان الاصباغ وقالت اقدر اسويلج البيس بني افتح من لون شعرج الطبيعي طبعا والخصلات عسليه قلت لها توكلي على الله
قصت لي شعري وصبغته وسنعته بساعتين وشوي
والنتيجه تقريبا نفس اللون اللي بالصوره فوق (الصوره من اكاونت الصالون) وايد حبيت النتيجه الحمدلله
شكرا مدام هيام تسلم ايدج واشكر الاخت لولوة صاحبة الصالون
صالون تربل في السره، قطعه ٦ ش١١ مجمع مبارك الدور الاول
تلفون : ٢٥٣٤٦٤٨٨
Instagram @triple_salon
