أمينه في أمانيها .. هالله هالله

قبل چم شهر ملجت اختي الله يحفظها وكانت بتسوي يمعه محفوفه لرفيجاتها مثل البرايدل شاور بس بطريقه كويتيه هههه
المهم هالشي قررنا نسويه قبلها بجم يوم والمعزومين مايتعدون ال ١٠ تقريبا من صديقاتها القراب

وكان خاطرها بيلوه فقلنا نستانس ونضحك ونسويلها يلوه عنونه بينا 🙂
جهزنا قطعة القماش مالت اليلوه واتفقنا مع البنات المعزومين انه نلبس كلنا دراريع

واللي ما يعرف اليلوه او الجلوه
هي عباره عن اغاني واهازيج تقولها النساء في الاعراس احتفالا بالعروس
وصفتها ان تجلس العروس على كرسي بعد أن تلبس ثوبا أخضرا زاهيا مع كامل الحلي والذهب وتأتي اربع نساء او اكثر معهن قطعة قماش واسعه لونهااخضر مربعه ومطرزه بخيوط ذهبية وعليها بعض العبارات مثل هب السعد او اسماء المعاريس او عبارات اخرى وتمسك كل امرأه من هذه النساء الاربعه بطرف من قطعه القماش ويبدأن برفع القطعه وانزالها فوق رأس العروس ويرددن هذه الاهزوجه ويتحلق باقي النساء حول تلك النساء الاربعه والعروس

ومن احلى اغاني اليلوه

أمينة في أمانيها
مليحة في معانيها

تجلت وانجلت حتى
سألت الله يهنيها

جبينها كالبدر ياضي
وريقها يشفي أمراضي

لها رب السما راضي
وأحسن في معانيها

حسافه ماقدر احط لكم صورة بدلة اختي لانها متحجبه بس هذي بعض صور دراريع الحضور
اما البوفيه العنونو البسيط فكان على الطريقه الكويتيه بس مطور 🙂 جهه للاكل وجهه للحلوبات الكويتيه والحليب وتوابعه من درابيل وبقصم وقرص عقيلي ورقاق وغيرهم
اغلب الاغراض شريتها من سوق المباركيه حتى القماش اللي زينت فيه الطاولات والاكل الاغلب من البيت
المطاطير وديتهم جمعية الفيحا فوق وكتب لي عليهم
هالكيكه هديه من وحده من صديقاتها
كيوت تشوق
الكيك بوبس هديه من بيكاريستا الحبيبه :*
كانت يمعه حلوه وونيسه والحمدلله استانسنا والله يتمم علي فطومتي وعقبال ما اصورلكم استقبال ولادتها 🙂