كانت لي تجربة الاسبوع الماضي مع شركة دايت كير لبعض الاطباق من قائمة الطعام الجديده لديهم ولفترة الغداء فقط لمدة ٥ ايام
للامانه ماكان الموضوع لعمل ريجيم لكن لتجربه الطعام واعطاء التقييم له
قبلها بأيام اتصلت احد الاخوات من الشركة وطلبت مني اختيار الاطباق التي افضلها لكن اعطيتها حرية الاختيار على ان لا يحتوي اكلي على الاسماك لاني لا افضلها الا من اماكن معينه وبطريقة طهي معينه ايضا
قائمة الغداد تحتوي على الطبق الرئيسي والسلطه اضافه الى اختيارك من الشوربه او الحلو وطبعا كان اختياري للاخير 😉
غداء اليوم الاول في الصوره اعلاه كان عباره عن رانش التكا مع الخضراوات والبطاط المكعب ب ٤٠٠ كالوري اضافه الى سلطة الروب الفارسي مع الخيار ب١٠٠ كالوري وحلو الاكلير ب ٢٠٠ كالوري
التكا لذيذه بس شويه يابسه يبيلها تكون لينه اكثر والخضروات كانت طيبه، الروب لذيذ والاكلير كبير وطيب
اليوم الثاني كان الغدا صدر ديايه مع الجين والمشروم والماش بوتيتو ب٤٠٠ كالوري مع سلطه سيزر ب١٠٠ كالوري وحلو تك ب ٢٠٠ كالوري
هم كانت الديايه شوي يابسه والماش بوتيتو عجييييب اما السلطه ماكليتها طاحت مني والحلو معروف لذيذذذ انا على طول اشتريه من الجمعيه
اليوم الثالث كان الغدا دياي تكا مع البطاط والعيش ٤٠٠ كالوري و ورق عنب ب ١٠٠ كالوري والحلو كان بسكوت نوتيلا موس ب ٢٠٠ كالوري
الدياي كان لذيذ مع صلصته والعيش طيب اما ورق العنب ماحسيت انه مال ريجيم كان طيب جدا والبسكوت بالضبط چنه غريبه
اليوم الرابع غداي كان دياي مشوي مع اللوز والعيش بالشعريه ب٤٠٠ كالوري وسلطة الشمندر مع الملفوف ب١٠٠ كالوري والحلو كان ماربل باوند كيك ب ١٠٠ كالوري
الدياي كان خياااااااااال الصلصه مع اللوز نااااطعه دورته باكثر من جمعيه عقب ماحصلته ان شاء الله ينزلونه
السلطه كانت عجيبه بعد اما الحلو كان زين بس حسيت الكيكه وايد حاليه يبيلها تخفيف سكر
غدا اليوم الاخير كان داوود باشا مع عيش شعريه ب ٤٠٠ كالوري وسلطة الجرجير ب ١٠٠ كالوري وحلو بجوز الهند ب٢٠٠ كالوري
داوود باشا خطير والجرجير عجيب اما الحلو ماكليته مو ذاك الزود مع جوز الهند
خلاصة التقرير وبأمانه انه الاكل كان ٨٠٪ لذيذ وكميته رااااهيه بالنسبه لي مع اني كنت ارد من الدوام يوعانه ماقدر اكمله كله الكميه كبيره ماشاء الله، انا افكر اني اشترك معاهم مع اني سمعت من بعض صديقاتي اللي كانوا مشتركين فيه انه يثبت الوزن اكثر مما انه ينزله لكن ودي اجرب هالشي بنفسي
انتوا شرايكم تنصحوني ؟
للاستفسار عن اي شي يتعلق بنظامهم الاتصال على ارقامهم
22942831-22942832-96005318
instagram @TheDietCare