قدمت لي فرصة جميلة من فندق جميرة شاطىء المسيلة لأخذ جولة وتجربة السبا الجديد الذي تم افتتاحه مؤخرا
في هالسبا بتلقون كل الاشياء اللي تخليكم تتمتعون بالاسترخاء مع توفر احدث انواع العلاجات
المكان هادي جداً وكبير لازم تكونون ماخذين موعد مسبق لعمل المساج وبعدها تختارون الخدمة او العلاج اللي تبونه
اذا وصلتوا الاستقبال الخاص بالسباب يقدمون لكم ابليكيشن عن المعلومات الخاصة فيكم وبعض الاسئلة عن حالتكم الصحية والاماكن اللي تحبون تركزون عليها وقت المساج
بتشوفون بعد بالاستقبال عرض لبعض منتجات التجميل
دخلنا بعدها مع الموظفه الخاصه لغرفة اللوكر ومكان التبديل .. اللوكر مرتب وداخله بتلقون الروب اللي وايد حبيت نعومته على الجلد وكل اللي تحتاجونه وطريقة اغلاقة سهله واحسن وايد من المفاتيح او الكروت اللي اغلب اماكن السبا تستعملهم
وبتلقونه يمهم مكرم السامع حمامات ومكان خاص لتسريح الشعر
وبدينا بالجولة ودخلنا السبا
المكان وااايد حلو والاضاءة رائعه للاسترخاء والريحة فريش خنينه
عندهم 17 غرفة داخل السبا اضافه لجناحين خاصين
ودعت اختي وصديقتي واتجهت للغرفة الخاصة بالمساج وكانوا مختارين لي المساج السويدي
ويعرف عنه بالتدليك الكلاسيكي
بدت معاي بفوطة ساخنه على الريل وبعدها مساج خفيف وركزت بالضبط على الاماكن اللي كنت كاتبتهم بالورقة
خمسة وخمسين دقيقة من الاسترخاء والتدلع وقبل نهاية المساج ردت حطت ماي حار بفوطة على ريلي ورشت بالهوى ريحة وايدعجيبة نزل الرذاذ على ويهي كان وايد منعش
بعد المساج خذتني لغرفة الاسترخاء وطلبت مني اختيار الجاي اللي ودي استمتع بشربة بهالجو الطيب
طلبت جاي ليمون كان عجيب
من الاشياء المختلفة واللي وايد حبيتها في سبا تاليس انه التجربة مو بس للمساج انما متكاملة وتقدرون بعد المساج تستمتعون
بباقي الخدمات والمميزات مثل غرفة الملح والبخار والثلج والهيدروثيرابي والجاكوزي والعلاج بالالوان اضافه للعلاج المائي
غرفة العلاج بالالوان سرير مريح مجرد تسترخون فيه وتهدون ذهنكم وتختارون اللون اللي تحبونه
غرفة الملح فيها 6 سراير و موجود فيها ارقى ملح من جبال الهملايا ذو الفوائد الكثيرة منها علاج الجهاز التنفسي والربو والحساسية والتهاب الجيوب الانفية والاكزيما
احلى استرخاء على فراش الماي الحاااار بغرفة الملح
هذي غرفة السونا
طبعا في مرافق اخرى مثل غرفة الثلج والهيدروبول والبخار ماقدرت اصورهم كان فيهم ناس
بس اللي بيروح يحط في باله ملابس سباحه للحوض والبخار
لاحظت شي انهم حاطين بكل مكان ماي منعش مثلج بالنعناع والليمون او الخيار حبيت الفكرة وصج طعمه منعش والشي اللي فعلا الواحد يحتاج له بعد خروجه من مكان حار مثل السونا او البخار وحتى باقي المرافق 🙂
بالنسبة للاسعار صديقتي كانت معاي ودفعت 29 دك للمساج السويدي لمدة 55 دقيقة
واشوف السعر معقول خصوصا بوجود مميزات وخدمات اخرى غير المساج
For appointments call (965) 2226-9688
Email: jmbtalise@jumeirah.com
One comment
Comments are closed.