@ChocolatenessKw @The_Avenues Food Tasting

يوم الاحد كنا على موعد لتذوق اطباق جديده للمنيو الجديد في الفرع الجديد لچوكلتنس في الاڤنيوز – سوكو بجانب كافيه نستله تول هاوس

المكان وايد اكبر من فرعهم الاول في برج جاسم و الديكور وايد راقي والاحلى انهم استعانوا بشباب كويتيين بأغلب الاعمال من التصميم والتصوير والنجاره وغيرها اضافه الى انهم استخدموا اعادة التصنيع للمحافظه على البيئه في اكثر من شي مثل الطاولات والاضاءه واكياس الٍتيك اوي وغيرها

المنيو يحتوي على الاطباق من المقبلات الى الحلويات واشياء يديده وايد تقدم فقط بفرع الاڤنيوز

طلبنا الموهيتو العادي وكان طيب و باشن فروت موهيتو

Mix Leaves Salad
نوعين من الخس مع الجرجير والافوكادو والمشروم والطماط مخلوط مع الموزريلا والبلسمك

Cheezy Spinach Bites
قطع جبن الموزريلا بالبقسماط ومحشوة بالسبانخ ويقدمونها مع صلصة المارينارا
وايد حبيتها لذيذه وماحسيت بطعم السبانخ قويه

BBQ Beef Burger
برجر مع الخس وفطر البرتابيللو مع جبن الشيدر وصوص الباربكيو
البرجر وايد لذيذه

طلبنا قهوة امريكانو على ما نختار نوع الحلو اللي نبيه

طلبنا نوعين من الحلويات و صاحب المطعم راكان الفضاله نصحنا بنوعين ثانيين وطلب منا نجربهم
قفشه صغيرونه من كل نوع ماتضر 🙂
اول شي وصلنا النوتيلا بودينق مع ايس كريم ڤانيلا شي ما صار وكلش مو ثقيل النوتيلا مخففينها الظاهر وصايره الذ

البريد بودينق وااااايد لذيذ والمفضل بالنسبه لي

Block 3
شي يديد و مكس متمازج كيكة البراوني بالمكسرات ومحشوه بكريم بروليه
حسيتها ثقيله بس اصحاب المزاج ابخص 🙂

المرقاب
اسم لحلو يديد عباره عن كوكيز مقرمش داخله چوكليت سايح وفوقهم سكوب كبير من ايس كريم الڤانيلا
وايد لذيذه
واختيار الاسم لانه اسم للمنطقه اللي فيها فرعهم الاول