باليوم الثالث زهبنا غريضاتنا وجناطنا وكنا حاجزين قبلها بيوم تذاكر للعباره اللي بتاخذنا الى بورصه
واسم العباره او الميناء ido
حجزنا كان على البزنس لأنه الفرق كلش مو كبير والسعر جيد تقريبا روحه ورجعه مايقارب 12 دك
بس خلوني اقولكم شي احنا بما انها اول زياره لنا لتركيا فمو عارفين طبيعة الديرة عدل وكان معانا جناط كبار صج يندزون بس هب كبار وهناك ماكو حمالي يشيل ! يعني اخدم نفسك بنفسك والمشكله عندنا جنطتين زياده عن عددنا و ويل جير فتبهذلنا شوي
فاللي مفكر يروح بورصة او اي مكان بالعباره يحط في باله جنطة صغيره وسحب
مكان البزنس فوق وفيه كافتيريا صغيره وتحت في محل صغير للمجلات والسيفونيرات
العباره حلوة لكن عيبها انكم ما تقدرون تطلعون برا تصورون 🙁 يقولون في عباره ثانية مكشوفة بس ماعرف اسمها والله
مدة الرحلة ما يقارب الساعتين
ونفس الطريقة كل واحد ياخذ جنطته ويتوجه لمكان المواصلات ان كانت باصات او سيارات خاصه او اجره
كان حجزنا في فندق Baia Bursa
فندق 4 نجوم مرتب يمه سوبرماركت ميجروس ومجمع صغير وبعض المطاعم والكافيهات
اهم شي الوايف اي فيه مجانا والغرف مع الريوق لكن الموزع اللي قلتلكم عطوني اياه الفندق اللي باسطنبول مجانا للاستخدام هني قالولي لا ماكو الا اذا بتشترينه نبيعه عليج ب 20 ليرة قلتلهم مشكورين مابي ورحت السوبرماركت خذيتلي واحد ب 5 ليرات 🙂
اكتشفت شي في كل فنادقهم خدمتهم لتسليم الغرف بطيئة يعني لازم تنطرون فوق الساعه علشان تستلمون الغرف
المهم في هالساعه قابلنا شخص اسمه علي وهو مرشد سياحي في شركة اسمها عباسي يتكلم عربي لأنه فيه عرج سوري وهالشي سهل علينا التعامل معاه
اتفقنا معاه على اساس ياخذنا الساعه 4 في رحلة للريف والشلال والمناحل
وبعد استلام الغرف ريحنا شوي على ما صارت الساعه 4
من داخل الغرفة
الاطلاله
وصارت الساعه 4 وكانت السياره جاهزة بانتظارنا واللي حبيناه ان الكراسي ل6 اشخاص مجابلين بعض نفس تكاسي لندن
اول شي ودونا الريف مكان مرتفع وبيوت بورصه القديمه والناس البسيطة
بتلقون كشكات يبيعون فيها بضايع صنع يدوي مثل الشالات والمنتجات الخشبيه والسيفونيرات والاشياء اللي حايكينها بايدهم وكشكات تبيع الفاكهه الطازجه وبالاخص الفراولة وانواع التوت وحتى عصير التوت
هذي المرا اللي شرينا منها توت يحليلها
واللي يبي يشتري عصير التوت الفريش
الورود ماشاء الله اتينن
اللي بيروح هناك لازم يكون عنده لياقة شوي لانه طريقة الحجر بالممرات والدواعيس للقرية تعور الريل حتى وانتوا لابسين جوتي رياضة سبحان الله يقولون علشان وقت الشتا والمطر والثلج ما يتزحلقون لانه الارض تكون حرشه ماتزلق
واحنا نتمشى سمعنا صوت هواش عيايز ههههههه جان نوقف نتطمش مع الناس ولا السالفة انه وحده من العيايز ساكنه توها من فترة قريبة والعيوز الثانية قديمة واليديدة عندها احفاد يجابلون بيت الجارة ويلعبون بالتراب وهذي مسيجينه تتنرفز عاد يقولون الصلح خير قامت اختي الصغيرة وطيبت خاطرها وعاد سألناها يصير نشوف بيوتكم من داخل قالت حياكم
لما شفت البيت ضاق خلقي عليها فيها جريب ال80 او 90 سنة وهذا بيتها وعليه .. ربي لك الحمد على النعمه
شوفوا بيتها
وتمشينا ليما وصلنا بيت العمده لوول بيت عمدة وقالبينه مطعم شلون مادري ههههه
ويقولون مصورين فيه بعض مسلسلاتهم التركية اللي ماني من متابعينهم كلش
وخايفين على المكان فطلبوا منه نفصخ جواتينا او يلبسونا جياس بريولنا
والبيت اللي وراه يسوون خبز نفس الرقاق ويبيعون
هذا نص اليوم خلص والنص الثاني قريباً في البوست القادم 🙂
خووووووش تغطية بانتظار الجزء الثاني
العبارة خذيتوها من اي مينا؟
ويعطيج العافيه 🙂
Comments are closed.