My Trip to Turkey – Istanbul Day 1 رحلتي الى تركيا – اسطنبول اليوم الاول

day1turkey1وطارت الطيارة التركية من الكويت الغاليه باتجاه تركيا وتحديداً اسطنبول

بهالفترة وقبل لا نوصل خل اقولكم سالفة هالسفرة .. اول مره بحياتي اسافر وانا مغمضة لا ادري عن حجوزات ولا مناطق ولا اماكن ولا شي بس انه بنروح تركيا لأنه السفرة صارت بتخطيط يوم واحد وربي سهل واختي سوت حجوازاتنا كلها بليلة وكل اللي سويته عطيتها الفلوس وليلحين والله مادري عن الحسبة شلون قايلة المهم التوتال ههههه علشان جذي لحد يسألني عن الاسعار بخصوص التذاكر والفنادق عندكم اكثر من موقع مجرد تحطون التاريخ ويطلع لكم السعر واكيد بالانترنت اقل من السفريات بوايد

بعد مايقارب 4 ساعات الا ربع وصلنا الاجواء التركية والحمدلله

day1turkey2بخصوص فيزا تركيا تقدرون تسوونها بالانترنت بدون لا تنطرون دور بالمطار ومع الاسف احنا ما كنا ندري عن هالشي وانصدمنا انهم ما يقبلون الليرة لتخليص معاملة الفيزا لازم دولار او يورو وما كان معانا فأضطرينا نستخدم الماستر كارد وقيمة الشخص 20 دولار مدتها 3 شهور

Link  هذا الموقع الالكتروني لطلب الفيزا

في اسطنبول مطارين احنا كان وصلونا لمطار اتاتورك

day1turkey3اول ما خذينا جناطنا فكرنا بكروت الموبايل صرنا مانقدر نستغنى عن التكنولوجيا 😛

مرينا فودافون خذينا خط بقيمة 110 ليره مع 1 قيقا انترنت سهالات وخدمة ممتازه وسريعه والانترنت تبطل بعد ساعتين واستخدمته طول فترة السفره ما زدت عليه فلوس كلش ومكالماتي كانت عن طريق برنامج الفايبر الله يوفق من سواه 🙂

day1turkey4طلعنا برا صوب التكاسي ولقينا سيارة راهية مثل الباص بس مو تكسي واتفقنا معاه على 30 ليرة و خذانا الفندق اللي كان قريب من المطار

وهذي صور من مطار اتاتورك لي فندقنا

day1turkey5Wow Airport Hotel وصلنا لفندقنا

الفندق لاباس فيه 4 نجوم بس كلش مايمة شي يعني ماكو تمشي بس مجابلة برجر كينج ويمه كافيه ثاني بقعده خارجية وداخليه

day1turkey6الاجراءات خذت وقت والله مو سريعين بس وجود الوايرلس المجاني في اللوبي شفع لهم ههههه

وهذي الغرفة مرتبة والروم سيرفس كانوا خدومين وبشوشين وايد

واول مادخلت كنت بشحن التلفون ولقيت انه فيشة الكهربا ام راسين 🙁 وانا يايبه ام ثلاث كلمت الروم سيرفس ووفرولي القطعه مجانا للاستخدام

لالالالالالالالالازم تحطون في بالكم سالفة الفيشة

day1turkey7day1turkey8هذي القعده الخارجية للكافيه اللي مجابل الفندق

day1turkey9صلينا وتوكلنا على الله المول اللي مو بعيد عن الفندق لكن مع الاسف اكو شق نهر فمايصير مشي لالالازم تكسي وياخذ 10 ليرات  للتوصيل

Airport Outlet Center

المول 6 طوابق ومختص بالمحلات الاوت ليت تلقون بعض المحلات المعروفه مثل مارك سبنسر وبنيتون وغيرها بس الاغلب محلاتهم اهم وبصراحه كل شي دااااااااثر مايسوى العنوه وهم فيه سينما واكيد بلغتهم التركية علشان جذي مادخلنا افلام هناك وعندهم بعد صالة تزلج

day1turkey10هالمحل استانسنا عليه عنده خرابيط تشوق بس الاسعار موهينه

day1turkey11

كنا ميتين يوع فأخترنا مطعم من المطاعم الموجوده في المول

اسمه Bursa Kebap Evi

قلنا نجرب الشاورما اللي كل من يتنطع بشاورمة تركيا

اختي قالت نطري ناخذ وحده بيني وبينج ونشوف اذا لذيذة نطلب على الراحة لأنه الشكل مو عاجبها وايد قلت يالله وبنت خالي طلبت هالشي اللي تحت مادري شسمه الله يزيد النعمه وتحته عيش والباجي طلبوا ماكدونالدز

باختصار ما كملت نص الشاورما 🙁 الله يزيد النعمه

واللبن عندهم بتركيا شي مقدس يموتون عليه وهالماركة كان طعمها نفس كي دي دي اللبن الاخضر المعلب طويل الامد مااالح

day1turkey12

وانا اتمشى تحت حصلت كافيه مادو اللي كل من يمدح بكنافته فقلت يالله نجرب نعوض الغدا اللي ماكليناه

قلتله ابي كنافه قال ماكو 🙁 شهالحظ يالله ما عليه طلبت بقلاوه وايس كريم فستق مع القهوه التركية ههههه لا تضحكون علي هم ما كملتهم وحقدت على اللي قالوا اكل تركيا طيب لكن وراي 6 ايام نشوف شيصير فيها

day1turkey13day1turkey14day1turkey15day1turkey16

بعدها ردينا الفندق ريحنا شوي وخذينا تكسي وصلنا لي مول Kapa City

وهذا عنوانه Zeytinlik Mah. Fişekhane Cad. No:7, Bakirkoy

وايد اهون من المجمع اللي طاف على الاقل المحلات اذرب واغلبها معروف بريشكا واكسسريز ولوكسيتان وتومي هلفيقر وسي اند ايه وغيرهم

وفيه مطاعم وقهاوي وسوبرماركت ميقروس

واللي بيروح تركيا بيلاحظ انه كل المولات تقريبا والمرافق اللي فيها زحمه وسياح تلقون فيها كراسي للمساج 🙂 تحطون ليره وحده ويشتغل المساج لمدة 3 دقايق خوووش شي صراحه

day1turkey17

هالمحل Flormar  للمكياج شفته بالمجمع واللي تشتغل حبوبة اسمها فاطمه وايد خدومة

البنات بالانستغرام يقولون الماركة موجوده بمراكز التجميل والمباركية بالكويت بس بعض البنات يقولون مو كل شي موجود

المراد ترى الماركه الحمر ملوتها وايد حلوين ويتمون فترة طويلة حتى لو شربتي وكليتي واسعارهم وايد حلوة مايتعدون ال3 دك وشي اقل بعد وهم كريمات الايد عندهم حلوة خذيت منهم

day1turkey18

هالجمعية امووت عليها موجوده بجنيف بس اللي باسطنبول تختلف شوي مالت جنيف احلى

day1turkey19

وشفت ستاربكس فدشيت اتفقد الجديد واللي غير عنا عندهم صورت جم صوره وطلعت

day1turkey20

وطلعنا نتمشى بالشارع اللي فيه المول

day1turkey21

بأغلب الشوارع تلقون اللي يبيعون صمون سميط و ذرة ودندرمه (ايس كريم) وغيره من اكلهم وبالشتا تلقون عربانات تبيع كستنه

day1turkey22

لا تخترعون اذا لقيتوا يمكم حشا السامع كلاب لايثه بالشوارع شي مو طبيعي كل مكان كلب ونفس الشي القطاوه بس قطاوتهم يخرعون يخزون واذا قربتي عادي تطلع لج انيابها وتلحقج مثل ما صار فيني عقبها بجم يوم 🙁 خلتني اطامر بنت اللذينه

day1turkey23day1turkey24

وختمنا اول يوم بمطعم مادحينه حق بنت خالي شوي بعيد بس يستاهل

Develi Restaurant Florya

وهذا العنوان Çiroz Mevkii İstanbul Asfaltı Petekevler içi Florya/İstanbul (Florya Büyükşehir Sosyal Tesisleri Yanı)

والله المطعم مرتب واكشخ مطعم دشيناه بتركيا بصراحة واخترنا نقعد برا بالهواء الطلق خوووش قعده

day1turkey25

ضيفونا بالخبز الزين والجبن الابيض مع الجوز والزبده

day1turkey26

طلبنا اكثر من شغله نسيت اساميهم بس الشي الاحمر اللي بالصورة بيديان مع طماط كان طبق القعده واااايد لذيذ والمشويات طيبه خصوصا تكا اللحم والدياي اما الحمص مو شي لا تطلبونه

day1turkey27

وبعد الاكل يابولنا ضيافة جاي تركي

day1turkey28

وطلبنا بقلاوة ما شاء الله كل وحده شكبرها فتقاسمناهم كل 2 بوحده وعلشان خالتي ما كلت حلو الويتر يحليله طار ياب لها صحن فاكهه مشكله مع ديب ككاو قالها علشانج وفري

day1turkey29

هذا الويتر الطيب اللي ماقصر معانا يحليله

day1turkey30

وهذي ادارة المطعم لما شافوني اصور قالولي صورينا يحليلهم عاد ماكسرت بخاطرهم

day1turkey31
وهذا يومنا الاول خلص والحمدلله ونشوفكم على خير باليوم الثاني تصبحون على خير 🙂

19 comments

  1. tahani says:

    موضوع رووعه وبوقته والأروع اسلوبج واهتمامج بأدق التفاصيل.. يعطيج ألف عاافية

  2. أوركيـديهه ه says:

    تقريرجج عجييب
    عآد آختي تمددح الشورمآ يمككن على حسب آلمطعم
    صور الجلابة عزج الله تخرع لو انا جان لميت العالم بصراخي
    آخخر مطعمم شكله خورآفي
    ننطر آلجززءء آلثـاني و قوآجج الله

    • PinkGirl
      PinkGirl says:

      الله يقويج حبيبتي
      طريقة شاورمتهم جنها روست بيف كلش موشي مكرم النعمه
      اي والله المطعم الاخير كان وايد حلو يسوى الروحه له

  3. دندرن says:

    قواج الله بدايه حلوه
    بالنسبه للجاي هذا لازم بتركيا 🙂
    بس الفيزا اللي اعرفه انه تقدرين تسوينها بالمطار ب ٢٠١٠ سويتها بالمطار جان تغير النظام الحين؟ الله اعلم
    اما الاكل شي طبيعي في اللذيذ وفي العادي والظاهر للحين طحتوا بالعادي هههه

    • PinkGirl
      PinkGirl says:

      الله يقويك
      اي صح الفيزا سويناها بالمطار بس لازم يكون معاك يورو او دولار ما يقبلون عملتهم الليرة
      والله الاغلب ما عجبني الاكل يازين اكل الكويت

  4. H. j. says:

    يعطيچ العافيه خوش تغطيه ، بس اشلون الجو في اسطنبول هالأيام ؟؟

    • PinkGirl
      PinkGirl says:

      الله يعافيج يارب
      هالايام مادري لأني حالياً بالكويت لكن قبل لا ارجع من 10 ايام تقريبا كان الجو حار

  5. dana says:

    لازم اتروحين محل اسمهاذا مي غلطانة gulu gulu موجود في اسطنبول يسوون احلا بقلاوة عجيبة لازم اتجربينها 🙂

    • PinkGirl
      PinkGirl says:

      ان شاءالله المره الياية لأني رديت الديرة من اسبوعين 🙂

  6. Elji3da says:

    الله يعطيج العافيه .. انا قاعدة ادور مواضيع تركيا واسجل حق لي سافرت ان شاالله

    بس ماعليج امر موقع الفيزا مايشتغل

    • PinkGirl
      PinkGirl says:

      يعتمد على ميزانيتج والاماكن اللي بتروحين لها وتسكنين فيها وجم شخص انتوا !!
      روحي السفريات وشوفي شينصحونج فيه واذا عندهم عروض
      واذا عجبتج الفنادق اللي كتبت عنها تقدرين تسألينهم عن الاسعار لانه كل سنه اكيد الاسعار تفرق

Comments are closed.