اليوم كنا على موعد للقاء المصمم العالمي روبيرتو كاڤالي اللي حضر من ايطاليا خصيصاً لافتتاح اول فرع لكافيه روبيرتو كاڤالي بالكويت وتحديداً في غراند افنيو بالافنيوز
وصلت بال 10 وكان كل شي مرتب من قبل شركة سنيار شغل عدل بصراحه الاستقبال والتنظيم
قبل كل شي ضيوفوني ماقصروا واستمتعت بكابتشينو كاڤالي على ما يوصل 🙂
التقيت بالمصممه نور خريبط (لاب 8) ياحلوها وكانت لابسه نظاره ريبان تشوق ماشاء الله وعليها من جدام شعار الكويت وعلى الاجناب انا احب الكويت ♡
النظاره ماخذتها من فاش كود بس حسافه سكر المحل بكبره .. اللي عنده خبر وين تنباع يقولي وايد حبيتها 😀
عليج بالف عافية نور
ووصل كاڤالي من جهة برستيج ومعاه اصحاب المكان
ويحليله طلع كاميرته وقام يجكجك الغراند افنيو و الاونرز ومستانس على المكان .. حبيت شخصيته وشلون تلقائي
دخل داخل وطلب قهوته وبدا يستقبل الميديا والبلوقرز واحد ورا الثاني وكل شخص له مدة دقيقتين فقط يقدر يصور فيهم ويسولف ويحصل على توقيع
شي مرتب ومنظم حبيت فيهم احترامهم الوقت وتعاملهم مع الكل سواسيه ماكو جريدة اكثر ولا بلوقر اكثر الكل دقيقتين وبس لأنه اصلا الريال بيسافر بعدها بساعتين ماكو وقت
بهالفتره كانوا يضيفونه في الطاولات الخارجية من الكانبيز والحلويات
المذيع صالح الراشد يجري مقابله مع كاڤالي بتلفزيون الراي بعدها كان دوري .. اول انطباع كان ممتاز الريال جداً حبوب وجنتل يضحك ويسولف على طبيعته
بعد ما سلمت عليه ودار بيني وبينه حوار صغير ما احس له داعي ينكتب 🙂
سألته شنو رايه بزيارته للكويت ؟ قالي مع الاسف انا وصلت امس وماشي اليوم وما شفت الكويت عدل بس الخطة الياية اني ازور الكويت واقضي فيها اسبوع واتعرف عليها اكثر
طلبت منه يوقع لي فأخذ منديل على الطاولة وسألني عن اسمي وكتبه على المنديل الخام الخاص بالكافيه
مع اي لوف يو والتوقيع 🙂 ♡
كلنا نحبك ونحب هديماتك وجنيطاتك ههههههه
جان يأشرون لي انه الوقت انتهى 🙁
سلمت عليه وتمنيت له رحله سعيده وطلعت
وهالصورة من تصوير المصور المبدع فيصل البشر
كل الشكر لكاڤالي كافيه وشركة سنيار على الدعوه .. تنظيم رائع مرتب وراقي وجهد تستحقون عليه الف شكر قواكم الله
One comment
Comments are closed.