حصري : لقائي مع المبدعين وراء عرض شركة زين في العيد الوطني

تذكرون العرض الرائع اللي سوته شركة زين للاتصالات كمفاجأة قبل العيد الوطني في مول 360 ؟ ونزلوا التسجيل كامل بعدها بأسبوعين للاحتفال بأعيادنا الوطنيه ؟

تبون تعرفون اشياء ما تعرفونها عن الفريق اللي فكر واللي خطط وتعب لمدة سنه كامله علشان يطلع العمل بهالصورة الجميلة ؟

خل اذكركم اول بالاوبريت وبعدين اسولف لكم  اللي سمعته 🙂

كان المفروض اسوي مقابلة مع القائمين على هالعرض واللي فكروا فيه .. مقابلة يعني اسئله وانا مو صحفيه ولا اعرف اصلاً اسئل انا وحده اعرف اسولف وجان فيه سؤال يطلع مع السوالف 🙂

هذا اللي قلته حق هالمبدعين الاربع اللي التقيت فيهم وكانوا الراس المدبر للعمل الجميل اللي استمتعنا فيه بشهر 2

بسمه النفيسي (مديرة الاتصالات التسويقيه في شركة زين) وفرح الكندري (رئيس فريق الاعلان) وعبدالمطلب نذر (منسق علامه تجاريه) وجاسم القامس (مدير تطوير الاعمال في شركة لايت بق)

بسمه بدت تسولف لي عن بداية التفكير بهالعرض خصوصاً بعد النجاح الكبير اللي حققته زين من خلال عرض الفلاش موب اللي قدموه سنه 2012 في الافنيوز 

كان لابد من التفكير بعمل ناجح هادف ومميز بنفس لحظات النجاح اللي حالفها الفلاش موب يعني من فبراير 2012 بدوا يخططون لهالعمل اللي قدموه لنا هالسنه

بدايتها كانت انهم يبون يقدمون عرض بستيج (مسرح) على شكل تلفزيون وبعرض يحكي عصور الكويت واهم انجازاتها بالسنوات اللي فاتت ! اوكي شلون شكل التلفزيون حجمه طريقته العرض الاستعراض كان لابد من الاستعانه بشركة متخصصه يكون الدورعليها بالتنفيذ وهني كان الاتفاق على شركة لايت بق ميديا 

JWT وشركة

انتقلنا بالحوار مع جاسم القامس علشان يسولف لنا شنو الترتيبات اللي قامت فيها شركة لايت بق بعد اخذ موجز الفكره كان عليهم التطبيق واكيد الشي مشاوره بينهم وبين فريق زين علشان يوصلون لعمل ناجح يرضي جميع الاطراف واكيد ما صار هالشي الا بعد ما عطت زين الكرت الاخضر للجميع طالما الثقه موجوده والمبدع لا يحتاج الا الى هذه الثقه ليخرج جميع الطاقات وهذا حقيقة ما يميز زين احتواء الكفاءات واتاحه الفرصه لخلق الابداع

اول شي فكرة التلفزيون لازم تطبق وكان لابد من قياسات معينه وحسبه معينه خصوصاً ان شرط فريق زين ان يكون فيه مجاميع ترقص فوق التلفزيون !! اكيد كان فيه ناس متخصصة بهالنوع من الديكور طبعاً واخذ اعتبارات ان التلفزيون لابد يكون على الشكل القديم

وضع التصور المهم للعرض واهم الاحداث اللي مرت على الكويت بثلاث حقب مختلفه وكان الاتفاق على ان البداية تكون من خلال استقلال ديرتنا الحبيبة الكويت كون العمل مقدم في فترة الاعياد الوطنية وتشمل ايضاً السبعينات بالعرض الاول ثم عرض مستقل لفترة الثمانينات المعروفة بالحقبة الذهبيه  ثم عرض خاص بالتسعينات والالفية

نوصل حق اختيار الاحداث خصوصاً ان الكويت ما شاء الله عاشت بهالحقب احداث كثيره سياسية ورياضية وفنية وثقافيه وبما ان المناسبه اعياد وطنية يجب ان تكون الاحداث المختاره مفرحه ومرتبطه في وجدان كل كويتي 

وبين استبعاد مقاطع من بعض المسلسلات واضافة اغنية من هذا الاوبريت وخلفيه صورة لتلك المقدمه  واضافه دعاية والغاء اخرى تم التوصل  للمحتوى الرائع اللي شفناه واكيد راح اذكره بالتفصيل 🙂

حتى اللحن كانوا يبونه بطريقة معينه تخلينا نرد بكل حنين الى ماضينا الرائع وهذا اللي قدر يوصله لنا الملحن مشعل العروج 

وكان الاستقرار على التالي 

فترة الستينات والسبعينات : 

* دخول المجاميع بالابيض والاسود كون التلفزيون بالوقت هذا بلونيه الابيض والاسود

* رفع العلم مع صور للمغفور له باذن الله الشيخ عبدالله السالم ابو الدستور ايذان باستقلال الحبيبه الكويت

* مسلسل اجلح واملح

* اغنيه شلون تمشي الحمسه

* شيلي قشج طلعي عن بيتي

* اغنيه هيله يا رمانه

* المنتخب في عصره الجميل

* لحن مسلسل درب الزلق

* اوبريت اقرع مقيرع

* مسلسل الابريق المكسور

* مسلسل مذكرات جحا

* اوبريت مداعبات قبل العسل

فترة الثمانينات : 

* الازرق في عصره الذهبي واغنيه هيدو

* خالتي قماشه

* اغنيه سكة سفر

* مقطع تلفوني كل دقيقه بس يرن من اوبريت بساط الفقر

* دعاية وشعار شركة ام تي سي اللي كان تأسيسها بالثمانينات

* اغنية بنقولكم سالفه من احد الاوبريتات الوطنية

* فرقة التلفزيون واغنيه صبوحه

* اغنية يوار يوار وافتيني من مسلسل مدينه الرياح

* اغنية رباعي الكويت ثلاثه رايحين الصالحيه

* اغنية فرقة التلفزيون .. مفتون قلبي في هوى الغزلان ياعبيد

* مسرحيه باي باي لندن ومقطع الحرمي مايموتشي

* اغنيه اه يا سويداني

* اغنيه الله يخليها لنا الكويت ديرتنا

* اغنيه الاولى انتي

فترة التسعينات والالفين :

* الغزو العراقي الغاشم وكلمه المغفور له باذن الله الشيخ جابر الاحمد في الامم المتحده

* التحرير

* اغنية وطن النهار 

* اغنيه انتصرنا والناصر الله

* آبار النفط

* اغنيه الحمدلله على السلامه ربنا رب كريم

* حقوق المرأه السياسية

* اغنيه منهو مثل الكويت

* فرقة ميامي واغنيتهم المشهورة عاشوا

* اغنية يما ينني بنسفة غترته من مسلسل قاصد خير

* المشجع المشهور القبقب واعلان ام تي سي فودافون

* تغيير اسم ام تي سي الى زين ومسرحيه زين عالم جميل

* اغنيه انا كويتي انا النظره انا الفكره 

وهنا يأتي دور اختيار المجاميع المشاركه من قبل لايت بق واكيد ماراح يكون الاختيار عشوائي .. العرض بيكون فيه تقليد واستعراض وحركه ولازم اختيار المشاركين يكون دقيق علشان جذي تم اختيار 14 طالب من المعهد العالي للفنون المسرحيه اضافه الى اكثر من 30 شخص للاستعراضات وتم تدريبهم في 4 اماكن مختلفة وكان تدريبهم الى يوم العرض الفجر وبعضهم نام في 360 حتى وقت العرض الله يعطيهم العافية

التخطيط والبحث والترتيب للفكره كان من سنه لكن التنفيذ كان ب 35 يوم فقط الموسيقى والديكور والازياء والتدريب 

الآرت دايركشن من لبس وميك اب كان مسند الى 5 بنوتات نشاط قاموا فيه بكل حرفنه اهم منيره العزاوي, لمياء السلاحي, ساره القبندي, فاطمه الحسينان ومريم العماني

تخيلوا كل شخصيه طلعوا الاقمشه المقاربه للبسها غير الميك اب اللي يقلدها والاكسسوارات من بواريك وغيرها والتجهيز للميك اب كل شخصيه حاطين صورتها بالاوراق مع الالوان الخاصه بالميك اب علشان تكون افكارهم مرتبه وقت العمل

واللي عرفته بعد ان الميك اب الابيض والاسود في بداية العرض كان متعب لكن اتقنوه وطلعوه بصوره رائعه

المخرج سيد العمل واكيد كانت ملاحظات المخرج احمد الخلف (مخرج المسرح) والمخرج يعرب برحمه (مخرج العمل) الى آخر رمق حتى قبل ان تفتح الستاره بثواني يكونون على الستيج يوجهون ويحرصون المجاميع على النقاط اللي شايفين انهم لازم يركزون عليها اكثر

كانوا حريصين الى درجه فضيعه ما شاء الله يعني تخيلوا حتى مكرم السامع جوتي المرعب جاسم يعقوب اديداس مو بوما وهالماركتين المشهورين حزتها واغلب الاحذيه منهم  وطريقة قصة شعره  وهذا اثنى عليه بو محمد لما دخل لهم خلف الكواليس

ومن الاشياء اللي مهمه ايضا ان الاربعاء تم تركيب الستيج وتغطيته بالكامل وآخر بروفه كون الستيج يديد ولازم التدريب عليه من قبل المجاميع كان فجر السبت والعرض كان السبت الساعه 10 صباحاً .. الكاست كله كان يشتغل ويمتعنا واهم مو نايمين ومواصلين علشان يقدمون عمل جميل قواهم الله

اللي حبيته ايضاً انهم بلغوني انهم حرصوا على دعوة الشخصيات والفنانين اللي قلدوهم واللي بعضهم اعتذر لظروف العمل او غيره لكن وجود بومحمد (جاسم يعقوب) مع عايلته الكريمه وضحكته وقت العرض كان لها اكيد شي كبير في النفس بمثابة تكريم لجهد سنوات وكذلك الفنان القدير ابراهيم الصلال وقت العرض كنت حريصه اشوف ردة الفعل كان مستمتع جداً اما فرقة ميامي المفاجأة موتتهم ضحك 🙂 شي جميل بصراحه 

الجميل ان الكاست 99% كان كويتي الشركة والقائمين على العمل من زين والعاملين بشركة لايت بق والمجاميع والميك اب والاضاءه والمصورين والمخرجين والملحنين .. عمل وطني بأيادي وطنية

كان الهدف من تقديم العمل هذا هو العزيمه والتفائل .. كل الاحداث الحلوة اللي بهالعمل من صنع ايادي كويتيه كافحت علشان نفتخر بكل ماقدموه للكويت بكل شي كانت الكويت سباقه وباذن الله وبسواعد عيالها تكون دائما الافضل شوية عزيمه واصرار والكثير من التفاؤل تكون كويت المستقبل اجمل واروع وهذا شعار العرض 

تاريخنا اصيل .. حاضرنا جليل .. مستقبلنا جميل

Make up team

بسمه النفيسي بالابيض والاسود 🙂

سر نجاح العمل تآلف المجموعه تبارك الرحمن 

شكراً بسمه فرح عبدالمطلب وجاسم على القعده والسوالف الحلوة تشرفت بالتعرف عليكم ومستانسة بالطاقات الكويتية الرائعه اللي اتاح لي البلوق فرصه الالتقاء فيها وبعد كل اللي سمعته انا متأكده ان العمل القادم بيكون اقوى واحلى وعالمكم جميل دائماً بإذن الله 

2 comments

Comments are closed.