Review : Eat Gourmet ,, Lunch Meal

هي فكرة يديدة ومبتكرة وخاصة بالموظفين Eat Gourmet

تعودنا نشوف علب شركات الدايت تتوزع على البيوت الصبح والظهر لكن ايت غورميه فكره غير ..  ملخصها الاهتمام بوجبة الريوق والغدا وانواع الساندويتش الخاصة بالموظفين على حسب الساعه اللي يحددونها ولها اكثر من اشتراك وخيارات الاكل متعدده

احلى شي اييك الريوق كامل ومرتب في بوكس انيق لي مكتبك بدون تفكير شنو تتريق ومن وين ؟

كان لي موعد مع فريق ايت غورميه  الاخت هند والاخ باسم في مكتبي وماقصروا شرحولي الفكرة واخترت الوجبات ومحتوياتها اللي ابيها وكلها لفترة الريوق وراح ابدي اجربها باجر الاحد ولي بوست آخر كامل عنها بإذن الله

هذي قوائم الريوق والغدا والساندويتش

بما ان اختياراتي كانت كلها لفترة الريوق .. اقترحت علي الاخت هند اضافه يوم لتجربة غداهم وتركت لي الاختيار من القائمة الاسبوعية اللي عندهم ومن بين الانواع الموجودة اخترت مرق البامية مع العيش الابيض ومعاها نوع من السلطة والسويت واخترت السلطة اليونانية وكيكة الفستق اضافه الى المشروبات الغازية وفضلت الماي

وصلتني العلبة بالموعد وحبيت هالبداية انهم ما تأخروا ومضبوطين بمواعيدهم 🙂

محتويات العلبة

السلطة اليونانية كانت راهية والخضراوات فريش وايد عجبتني

الغدا وصل حااار وشكله يشوق ومشاء الله المرق متروس من البامية الزينه واللحم

قطعة كيكة الفستق اللذيذة

باجر ان شاء الله يبدي عرضهم المقدم لي للريوق ومتشوقه اتذوق خصوصاً انه وجبة الريوق أحبها اكثر من الغدا والعشا 🙂

كل الشكر لإيت غورميه والاخ سعود العنزي على العرض المقدم لي ومتابعتهم وتواصلهم الدائم

Tel : 1800011

Site (Link)  FB (Link)  Twitter (@EatGourmet)

10 comments

  1. Sn3a says:

    عليج بالعافيه
    بس الساعه جم يوصلج الريوق
    انا انطلق لدوامي 6 ونص مافي شركه فاضيتلي لول

    • PinkGirl
      PinkGirl says:

      الله يعافيج حبيبتي
      تختارين الوقت اللي تبينه من الساعه 8 وطالع

  2. MubarakEsmail says:

    بالعافية بينك
    مشروع متميز وسمعت عنه وايد بالفتره الاخيرة
    ناطرين تقييمج للريوق
    وبالهنا والشفا مقدماً
    🙂
    بس للأسف موحاطين الاسعار بموقعهم ولا بفورمه الاشتراك

    • PinkGirl
      PinkGirl says:

      الله يعافيك اخوي بوفارس
      تابع بوست الريوق وتلقى المعلومات كلها 🙂

  3. Habo0osH says:

    حبيت الفكره حيل 

    خصوصا اني ما اطلع للدوام الا حدددده حده

    بالعافيه مقدما وناطرين بوست عن اول فطور

    • PinkGirl
      PinkGirl says:

      الله يعافيج حبيبتي والفكره وايد حلوة خصوصا للي ملتزمين وايد بالدوام

    • PinkGirl
      PinkGirl says:

      الله يعافيج حبيبتي والفكره وايد حلوة خصوصا للي ملتزمين وايد بالدوام

Comments are closed.