Review : Funky Chocolate Club .. Interlaken 

قبل السفر واثناء البحث عن اماكن نزورها في انترلاكن شفت الكثير من العرب كاتبين عن هالمكان

فنكي چوكليت كلوب 

محل خاص للشوكولاته ويسوي وورك شوب 

لازم تحجزون عن طريق موقعهم بالانترنت ىهذا اللي بتكلم عنه 

جربت احجز عن طريق موقعهم من خلال الايفون لكن كان صعب ومايكمل الموضوع فدخلت من الاب توب وشفت المواعيد واخترت اليوم وموعد الوورك شوب اللي تناسبنا وكملت الحجز بطريقه سلسه الى ان وصلت الى صفحة الدفع !!! 

دفعت وبعدها قلبت الصفحه بيضا :(​

وتم خصم المبلغ من حسابي الماستر .. فخذيت كابجر واحتفظت فيه بتلفوني وقلت خلاص دام انخصم فاكيد الحجز موجود .. جربت اكلمهم بالدايركت بالانستغرام لكن ماردوا على الرساله ولا شافوها وطاف 

 اليوم كان الموعد الساعه ٢ ورحت لهم بالموعد بالضبط 

لكن مع الاسف كان اسمي موجود عندهم بالسيستم لكن الموعد ملغي فتأكدت من بطاقتي الماستر واعتذرت بعد ماعرفت انه لاب توبي ماك والظاهر في خلل بالحجز من موقعهم لمستخدمي ماك وقالت مع الاسف وورك شوب الساعه ٢ فل اذا تقدرون في مكان فاضي الساعه ٤ فوافقت 

قدموا لنا هالسويت اعتذار عن الخربطه اللي صارت


هذا المحل من داخل وصور لبعض قطع الككاو 


والساعه ٤ رجعنا عندهم وقالوا لنا تفضلوا 

في غرفه تقدرون تعلقون فيها اغراضكم علشان تكونون مرتاحين وقت الشغل

وبعدين تغسلون ايدكم وتوقفون على مكانكم بالطاوله 


كل شخص جدامه مريول نايلون وقبعه قماش يلبسهم 


وبدا الشرح بمعلومات عن الككاو ومن وين وشنو مميزاته وفوايده وغيره

وقدمولنا نبتة الككاو نجربها


وبعدها ٥ انواع مختلفه من الككاو بين الدارك والككاو بالحليب والككاو الابيض

تخيلوا جربنا قطع ١٠٠٪‏ ككاو مافيها لا سكر ولا حليب



خيرونا بين الميلك جوكلت او الدارك

بالنسبه لي اخترت الدارك


وعلمتنا شلون الطريقة اللي نخلط فيها الككاو الذايب مع ١٠ قطع من الككاو اللي اخترناه وبعدها تأكدت من حرارة الككاو عند كل شخص لانه لازم يكون بدرجه حراره معينه علشان مايصير عليه الترسبات الدهنيه البيضا 


بعد الخلط حطيناهم في البيبينق باق وقصيناه من تحت شوي وبدينا نفرغ في اللوح 



عطونا اوراق خاصه مطبوعه نختار منهم 


وبدينا الشغل بالالواح 


بعد الاوراق يابولنا التوبينق حلاو ومكسرات وجوز هند وسكر نبات وغيره


وهذا شغلي :)​


طبعا ياخذونه يحطونه بالثلاجه وتستلمونه بعد ساعه على الاقل

ويعطونكم شهاده


وبعد تحطون دبوس على ديرتكم انكم زرتوا المكان

وماشاء الله الكويت والسعوديه مايبينون غصب دعست دبوسي


وبعد الوقفه ساعه كامله نعابل بالككاو شريتلي قهوه بارده تسرسح 


تجربه حلوه والستاف يتكلمون انجليزي بطلاقه وحبوبين لازم تروحون اذا مريتوا انترلاكن ​

موقعهم اضغط هنا

Hotel Metropole .. Geneve

صايره شوي كسلانه عن البوستات خصوصاً اذا كانت بوستات سفر وصور وايد فقلت اكتب لكم الاشياء المهمه علشان اذا رديت الكويت ما اتكيسل

وايد سويت سيرج عن الفنادق قبل السفر وفيه ناس ماشاء الله مسوين تقارير بس مو الكل يفصل بالصور خصوصا بالنسبه للفنادق

انا يهمني اشوف صور الفنادق اللي مصورينها الاوادم اكثر من الصور الموجوده في سايتات الفنادق ومواقع الحجز 

علشان جذي قلت احط صور فندقنا وافيد غيري

السكن كان في فندق ميتروبول جنيف ٥ نجوم 

اول مره اسكن فيه بس ممتاز وموقعه عجيب وعريق

بوسط السوق تنزلون سيدا جدامكم بوتيك برادا وهم يطل على البحيره وساعة جنيف المشهوره


لما تسوون الجيك ان يعطونكم كرتين للمواصلات من خلالهم تقدرون تستخدمون الترام والمواصلات البحريه خلال المده اللي تسكنون فيها


والانترنت مجاني وهذا المهم :)

هذي الغرفه


الفيو


وديرة الككاو ضيافتهم ككاو لذيذ 


اللي عنده سياره مع الاسف الفندق ماعنده باركنج مجاني فياخذ منكم سعر الفاليه وهالشي باغلب الفنادق بسويسرا وفرنسا بعد 

والتلفزيون اغلب القنوات العربيه موجوده شغل عدل للي مايستغنون عن التلفزيون 

حجزنا كان عن طريق مكتب سفريات لاني ماحب مواقع النت والدفع المتأخر فأدفع زياده وانا مرتاحه افضل مع العلم ترى في ضرايب اضافيه تدفعونها عند الجيك ان 

موقع الفندق – اضغط هنا

منتجع اكوامارين 

الاسبوع اللي طاف قضينا الويك اند في منتجع اكوامارين في النويصيب

المنتجع يديد وفاتح شهر ١٢ اللي فات يعني صارله ٩ شهور بس فقلنا نجربه


حجز الوالد الشاليه الكبير اللي على البحر مباشره وعباره عن ٤ غرف نوم ومكرم السامع ٣ حمامات اضافه لغرفه وحمام للخدامه والصاله وغرفة الطعام والمطبخ

انا كتبت التقرير لانه المكان وايد ناس مايعرفونه ولانه تجربه لازم تنذكر فيها الايجابيات والسلبيات علشان القراء يستفيدون 

اول شي دخول المنتجع كان سهل والمفروض كان الدخول لسيارتين واسمحوا لنا ندخل الثالثه 

ماطولنا باستلام مفتاح الشاليه والتچييك عليه وعلى الاغراض اللي بالمطبخ 

u الشاليهات على حرف ال

صفتين وبينهم حمامات السباحه للكبار والصغار وترامبولين وشفت نطاطيات بس مو تافخينهم


وهذا شكل الشاليهات اللي على البحر 


خلوني اراويكم الشاليه من داخل 

الصاله

واهم شي حاطين قنفات يلد علشان ماينتلفون وللامانه مريحين


طاولة الاكل ل٦ اشخاص


طاوله اضافيه ويوفرون ايضا طاوله بلاستك مع كراسيها للتراس


المطبخ


وفوق هذي شكل الغرف 

وحده ماستر مع حمامها و٣ عاديين


غرفة الخادمه


البحر عندهم عجيب اول شي حد يعني مستوى واحد مافيه غزر زايد وثاني شي نظييييييف والرمل املس ماشاء الله

طبعاً ماكو قواقع وصخور وحتى سمج ماشفنا كونه حد


شوفوا الرمل شلون نظيف


من العيوب اللي لازم تنذكر دوشات الماي للشاطيء !!!!

شلون دش وتالي تطب بالرمل !! مو المفروض وجود عازل خشبي او اسمنتي الواحد يمشي عليه علشان مايتدمر عقب ماينظف عمره من الرمل !؟ 

ياريت الاداره تنظر بهالسالفه لانه بالتالي شاليهاتهم اهي اللي بتروح فيها من الرمل والطين


من الخدمات الجيده وجود حمام سباحه للسيدات لكن حسافه بدون اي خدمات تذكر ومافيه عمق نهائيا حسيته حمام سباحة اطفال 


المنتجع فيه مطعم بافلوز ومطعم الفرية الكويتي وسوبرماركت صغير


تأجير قواري


الشي السلبي اللي كلش ماحبيته كون المنتجع بعيد وايد عند الحدود ومن مشرف لي نويصيب ساعه تقريباً المفروض الاداره تزيد الخدمات وتكون كريمه على الرواد علشان تكسبهم لكن مع الاسف في شاليهنا سيرفس الاتصالات كان معدوم وتلفوناتنا ماتشتغل ولما كلمنا الاداره وقلنالهم عن الانترنت قالوا غير مجاني وب٥ دنانير اليوم للشخص ! مع العلم عند التسجيل قايلين لنا مجاني ! 

تعرفون فجأة لما تنقطعون عن العالم لا تلفون ولا نت ! ضيم وحتى تلفون الشاليه مافيه اتصال خارج المنتجع !!! ولما كلمنا المدير عن هالمشكله قال هذا الموجود !! 

الشي الثاني الچوله او البوتغاز كهربائي بس حرارته ضعيفه جدا جدا يعني علشان تقلون بيضه مثلاً  يبيلكم ساعه كامله يمكن فشلون على اللي بيطبخون غداهم ؟ بلشه 

والشي الثالث ماعندهم تأجير جت سكي وبنانا وسوالف الوناسه هذي اللي يحبونها الاوادم 

هذي باختصار تجربتي للاستفاده

اكوامارين في النويصيب 

Tel : 22322233 ​

Instagram @aquamarineresorts

doubleshot.kw 

وصلني اليوم مشروع منزلي جديد مختص بالقهوه البارده

doubleshot.kw 

الباكيج مرتب ونظيف ومزين بالوريدات نزااااكة

يابولي ٣ انواع 

السولتد كراميل – الروز – المينت


الروز اينن ومافيه طعم قوي يعني تحسون بطعم الورد خفيف والسولتد كراميل هم متوازن وموحالي وايد ممتاز والمينت هم خفيف وتحسون بلسعة النعناع بس مو مركز وايد مضبوط


الروز بالنسبه لي كان نمبر ١ عجييييييب


الطلب عن طريق اكاونتهم بالانستغرام 

Instagram @doubleshot.kw 

Cute gratis lipstick


وصلتني صوغه كيووووت من تركيا من امونه صديقتي 

عباره عن سيت حُمر نتيييييفه

٦ حبات والوانهم تشوق صج على ذوقي 

واي قلبي الزبابيط شووووفوا الحجم 


وهذا الحجم بالمقارنه مع حجم الروج العادي


وهذي الالوان على ايدي 

وقوامهم حلو مو ناشف ولا كريمي وايد


Gratis تحصلونهم باسطنبول بصيدلية

Tasting Triangle’s new menu

تراينجل منزل اطباق كثيره جديده انضافت للمنيو 

كنت هناك قبل اسبوعين تقريبا مع خواتي وجربنا بعض الانواع الجديده اللي بحطها لكم 

هالمطعم وايد احبه وذوقي فأغلب الاطباق يازت لي 

مشروم بيلووو

مخاد مشروم لذيذذذذذه

img_2768.jpg

سلطة الكيل

هم اللي يحب السلطات هالشي ناجح وطيب لازم تجربونها

img_2767.jpg

بان فرايد 

بطاط مع اللحم والجبن السايح
img_2769.jpg

سموكد فدايد جار

هم هالشي لمحبين البطاط

جار فيه بطاط على شكل عيدان و جبن سايح واييكم حاااااار ويتمغط

img_2770.jpg img_2771.jpg

مشروم ريزوتو

عجيب كلمه تختصر الطعم

img_2772.jpgاولد سكول

تصدقون صرت ماعرف اعبر اذا فيه طبق على مزاجي لوول

هذا شي طيب 

img_2773.jpg img_2774.jpg

وفجأة يابولنا شيين عباره عن الوان وحلاو واشكال تشوووووق 

مال تصوير بصراحه مو مال نخرب الديكور الفرايحي ههههه

تراينجل فريك شيك

img_2775.jpg

هذا جبار عاد الذ عندي من الاولاني

فيه شعر بنات ومارشميلوو وتخيلوا مخلوط مع الشيك

img_2776.jpg

افلانش

شي يشبهه السمورز لذيذذذ

img_2777.jpg

نورث كيك طيبه مشرررربه حليب

img_2778.jpg

Triangle Restaurant located in Salhiya, Ali Al-Salem St, Aljawhara tower

Tel : 50838483

Twitter & Instagram @Tringlekw


Page 2 of 69812345...102030...Last »