ATLANTIS .. Dolphin Bay

من امتع الاشياء اللي لازم اي احد يروح اتلانتس يسويها

الدخول لخليج الدلافين واللعب معاها ولمسها

طبعاً لازم حجز مسبق يكون في المركز الخاص للحجوزات داخل فندق اتلانتس  وخذوا منها للشخص 500 درهم تقريباً

وصلنا خليج الدلافين ولقينا يمه ستاربكس

قعدنا ننطر تقريبا ربع ساعه بره على ما يخلصون المجموعات اللي موعدهم قبلنا

بعدين وصل دورنا وخلوني اوقع على ورقة اني مسئولة عن دخولي المكان وما لهم شغل شنو بيصير لي @@ طبعاً توقيعي نيابة عن قروب العائله اللي معاي كلهم

وعطوني هالكارد وطلبوا منه نستريح لأنها فترة راحة للدلافين بعد كل موعد

خلصت فتره الراحة وخذونا لمكان التبديل .. طلب منه الموظف نفصخ اي اكسسوارات لأن ممنوع تنزلون فيها بحوض الدلافين اضافة الى الموبايلات والكاميرات والشباصات وكانوا موفرين صناديق امانه للاغراض

بعدين طلب منه نصف طابور لأستلام الملابس الخاصة وهي نوعين لبس كامل او لايف جاكيت

بعدها خذونا غرفة العرض وعرضولنا فيلم عن الدلافين ومعلومات عنها

وبعدها قالولنا ان عدد الدلافين الموجوده عندهم 4 دلافين وكل مجموعه مكونة من 10 افراد راح يكون لها دلفين خاص

وقسمونا كل 10 مع بعض وقالولنا اسم الدلفين اللي بنروح له وكانت الدلفينه مالتنا لأنها انثى اسمها بيفالي 🙂

الحركات اللي يسويها الدلفين

رقصة مايكل جاكسون عجيبة لوول

طبعاً اول مانزلنا الماي اكتشفنا انه بااااااااااااااااااااااااااااارد قمنا نطقطق بس اشوة بعدين تأقلمنا

اول ما وصل الدلفين طلبوا منا نصرخ بأسمه كتحية لأن الدلفين كائن جداً ذكي وعارف حتى اسمه

علمونا شلون نقعد على ركبنا علشان يمر يمنا ونلمسة وطبعاً كانوا شارحين لنا الاماكن اللي المفروض مانلمسها في جسم الدلفين

الرقص مع الدلفين – رمي الكره – رمي الطوق تقدر تختار وحده من هالاشياء

ولد اختي رمى الطوف والدلفين يابه يحليله وشال الطوق منه ومسح عليه تحت بوزة يختي 🙂

انا اخترت الكره ويابلي اياها بحلجة يحلوة ومسحت عليه كتشجيع وخواتي رقصوا معاه لوول

وبعدها لميناه وبسناه وصورنا معاه وكذا مره يمر جدامنا ونلمسه تجربه صج صج حلوة

واخر شي مر جدامنا وسوالفنا باي باي خخخخخ وقلناله بااااي بيفاااالي 😛 

هذي مدربة الدلفين الخاص فينا

بعد ماتطلعون تكون ريحتكم زفررره كلش مو شي تقدرون تاخذون دوش

بعد ما تفصخون الملابس يتم توزيع المشروبات الغازية والماي البارد

وتدخلون السيفونير شوب تدفعون وتستلمون الصور اللي صوركم اياها المصور الخاص فيهم

وهني ملاحظة لازم تعرفونها .. اول شي ممنوع دخول الكاميرات الخاصة الا اذا كان واحد خارج المجموعه اللي بتدخل على الدلفين ويدفع 100 درهم بس علشان يصور

الصور اللي يصورونها لكم بتكون وايد ومن كثر ماهي حلوة بتحتارون شتاخذون

بالنسبة لنا خذينا سي دي فيه 50 صورة مع طباعة صورة كبيرة وصورتين صغار وكلفنا حوالي 450 درهم فضروري تاخذون فلوسكم معاكم خليج الدلافين لأن احنا ماكنا يايبين فلوس هالكثر واضطرينا ندز اختي الغرفة تييب باقي الفلوس 

Link