قبل جم سنه كنت مسويه بوست عن مطعم اسمه ساندويتش بار بالجابريه
ونفس المطعم فتح حالياً فرع ثاني اكبر واحلى وفكرته غير نهائياً عن الفرع القديم
بدعوه منهم رحت مع خواتي وعيال اختي حزت العشاء
علشان نستكشف المكان ونعرف فكرته
الفكره اللي قائم عليها المطعم انه يكون مكان ترفيهي يستمتع فيه كل افراد الاسره سواء بمشاهدة المجسمات العالميه او الخدمات الفنكيه المقدمه من المطعم وغيرها وبسعر الوجبه فقط
انا ما احب اتكلم وايد احب الصور اهي اللي تتكلم عن المكان خصوصاً اني صورت صور واااايد من كثر ما المكان يونس
اول ماتنزلون السرداب في بلازا السالميه بتشوفون مجسمات كبيررره عند مدخل المطعم
بيتي بوب وغيرها
فيه فترينه برا فيها شخصيات فنيه ومصارعين وغيرهم
حتى مدخل المطعم غريب !
مايفتح الا بكرت الموظفين وعندهم اوفر انه اللي اييهم وايد ويصير في اي بي يعطونه كرت يدخل بالوقت اللي يبيه
المطعم صج كبير بس مافيه طاولات وايد تقريبا ٤ طاولات كبار تكفي اكثر من ٨ اشخاص وطاولتين او ٣ تكفي شخصين
اول مادخلنا استقبلونا بالقهوه العربيه
حلاتهم 🙂
المطعم عباره عن متحف يضم مجسمات لشخصيات سينمائية مشهوره مثل باتمان وسوبرمان وهولك وثور وشخصيات كارتونيه نحبها مثل غراندايزر والسنافر وبيتي بوب وغيرهم
عندهم اكثر من ٦ مجسمات سينما كيت واغلب المجسمات نادره بالعالم وكل قطعه عليها تفاصيل وچم رقمها
وهذي صور للمكان وبعض المجسمات الموجوده
قسم شخصيات افلام الرعب مثل تشكي وايزابيل وسو وفريدي وغيرهم
سبايدرمان
سلاحف النينجا
افتار
ثور
سندباد يازينه
وشخصيات كارتونيه يحبها جيلنا مثل سالي وكاليميرو وموزه والشناكل والسنافر وتوم وجيري
توقيع مايكل جاكسون
المنيو مقسم لمقبلات وميني برجر وبرجر وساندويتشات وكوكتيلات وحلويات
وعلى مايوصل الطلب يابوا لنا مجموعه من الاكسسوارات اللي فيها اضاءة وسكروا الليتات علشان الواحد يستمتع بالجو
اليهال كيفوا
والشي الثاني اللي خلا اليهال طايرين من الفرحه ستاند كامل فيه ملابس الشخصيات للبنات والصبيان وللصغار والكبار
ويخلونهم يلبسون اكثر من شخصيه ويصورون
الصحون ورق على شخصيات كارتونيه مختلفه
قلاصات الكولا تشب ليت وكل واحد غير عن الثاني
حتى طريقة تقديم الاكل غير
شموع تشاشي وحركات
الكتشب والمايونيز على شكل مسدس
البرجر يابوها بصندوق جنه استريو وعليه جراقيات
اخترت سلايدر برجر مع صلصه الشوكولاته كنت مجربتها في فرعهم الاول وايد لذيذه
وقبل لانطلع وزعوا علينا حلاو ومجسمات صغيره ذكرى
يم المطعم فاتحين محل خاص لبيع التيشيرتات الخاصه بالشخصيات وبعضها ليمتد اديشن بعد
شكرا لساندويتش بار على الدعوه .. مكان يستحق الزياره وايد استمتعنا فيه احنا واليهال .. عسى الله يوفقكم
مكانهم بالسالمية، شارع سالم المبارك، بلازا السالمية، السرداب
Sorry, i only speak English! Where is this please?! I really want to go!
this is in Kuwait, Plaza Salmiya Complex
يعطيج العافيه على هالتغطيه
Comments are closed.