تطلعـون بروحكم ؟

Screen Shot 2014-12-23 at 11.42.31 PM من زمان ماسولفت معاكم بالبلوق صار كل شي الحين بالانستغرام !
بس ولهت اني افرغ كل اللي بقلبي هني وعلى راحتي مع ان ماكو تفاعل زايد بالكومنت مادري ليش متابعيني طاقهم الصمت هني بس يشوفون بعينهم ههههه

المهم كنت بتكلم عن سالفة الطلعه بروحكم !!

السنين اللي طافت كان عندي مشكله اني اتمشى بالسوق بروحي او اتغدا بروحي او حتى اشرب قهوه بمكان بروحي
كنت استحي ان الاوادم تطالعني وتقول شهالمينونه اللي قاعده بريحاتها بس مع الايام صرت احس اني بحاجة لهالقعده وانه الاوادم شوي شوي قاموا يتعودون على هالوضع خصوصا بوجود الانستغرام والسناب جات وهالبرامج صارت ونيس بالقعده ههههه

شوي شوي عودت نفسي اني استانس بالطلعه حتى لو كنت بروحي مع ان الصديقات وخواتي موجودين بس ساعات اتعييز حتى ارفع السماعه اقول حق احد تعال
اطق سيارتي سلف واروح اخلص شغلي بريحاتي بهدوء

بديت اول شي اشرب قهوتي بروحي او اخذ معاي الاب توب بعدين تشجعت اني اروح السينما بروحي خصوصا اذا العرض بقاعه في اي بي احلى واحلى اكو احسن من ان الواحد يدلع عمره
وبعدها شوي صار عندي الجرأه اني اقعد بمطعم اطلب غدا بروحي وعلمت رفيجاتي على هالسالفه
ما لنا غنى عن اليمعه والطلعه بس لازم الواحد يعتمد على نفسه ومايربط وناسته بالناس والوقت

يالله يا متابعيني الصامتين سولفوا معاي وقولولي جربتوا تطلعون بروحكم ؟ ولا ليلحين تستحون الناس يشوفونكم ؟ 😛

This entry was posted in General.

50 comments

  1. Mohammad says:

    انا قبل يومين اعترفلي صديقي انه لما احد يبي يطلع عادي يطلع بروحه.
    بصراحة تغيرت نظرتي له ما ادري ليش.
    صرت اشوفه استقلالي اكثر.
    انا ولا يمكن. الا اذا بدرس بكافيه مثلا بس

  2. najia echtibi says:

    احلى شي القعده روحج في اي مكان
    لول انا مثلج يوم اسير مكان استحي ايلس روحي
    بس الوقت يضطرنا خاصتا اذا كنتي بعيد صعب تنادين حد يجلس وياج في كوفي وانتي في زحمه الاشغال
    وجربي تقرين كتاب كل ماتطلعين وتجلسين روحج ^_^

  3. Asma says:

    اي انا اطلع بروحي اغلب الوقت عاااادي بالغالب كافيه وايبادي وراوتري او كتابي معاي واكل شي خفيف او بالسوق اخلص شغلي اسرع اذا بروحي .. بس مطعم الصراحة ما يحلى الا باليمعه .. والسينما صج ودي وفي بالي من زمان بس ماجربتها

    • PinkGirl
      PinkGirl says:

      صاجه المطعم يحلى باليمعه لكن على قولتج ساعات الواحد راح السوق بياخذ شغله وايي في بالج اكله معينه اول كنت استحي بس بعدين تيرعت وقمت اتغدى وامشي

      والسينما لازم تجربينها خصوصا اذا كانت في اي بي وناسه

  4. Noor says:

    اي غالباً اطلع بروحي اشرب قهوة واقرا كتابي وساعات السينما. احياناً الواحد يحتاج يطلع بروحه يخلص شغلم اسرع و يسولف مع بنات افكاره

  5. hala says:

    انا وايد احب الطلعة بروحي و بصراحه انجز فيها وايد وايد لان ما الهي لا بسوالف و بحاجات و اغراض غيري ….الكوفي ايضا جربته بروحي بس للحين ما جربت اكل وجبه بروحي مع اني متحمسه اجرب عن قريب
    ثانكيو بنكيتي علي هالسوالف الحلوه

    • PinkGirl
      PinkGirl says:

      حبيبتي يو ولكم :*
      اذا بتجربين لازم مطعم كبير هههه انا اول مره جربت كانت بدين اند ديلوكا ههههه

  6. bibi says:

    والله انا دايما بروحي اقضي مشاويري من سوق وصالون حتى الكافيهات والمطاعم اللي بره المجمعات اخذ راحتي اكثر فيها بروحي

    • PinkGirl
      PinkGirl says:

      انا عيل عكسج اكون طالعه بتسوق واخلص مشاويري فالمطاعم اللي بالمجمعات ناسبتني اكثر 🙂

  7. Lama says:

    عادي اروح السوق بدون ما يكون حد معاي.. و القهوة ممكن.. بس المطاعم مستحيل.. 🙂

    • PinkGirl
      PinkGirl says:

      هههههه انا كنت اقول جذي بس لما طق في بالي وانا ب٣٦٠ توكيو سالاد قلت بجرب وقعدت واكتشفت انه مو بس انا بروحي اكو غيري ٣ بنات يايين بروحهم هههههه

  8. bader says:

    اي عادي عندي اروح السينما او اشرب قهوه بالكوفي شوب او اتسوق بروحي اصلا بالعكس مرات يكون عندي احد يروح معاي بس انا ما ابي لانه اذا كنت بروحي كل شغلي يخلص و ما انسى شي + ممكن تحطين هالسؤال بالانستقرام لانه يصير تفاعل اكثر

    • PinkGirl
      PinkGirl says:

      اول شي كنت بحطه بانستغرام بس غيرت رايي وقلت بحطه بالبلوق خصوصا اني فقدت وايد التعليفات هني
      صارت الناس تشوف ماتعلق وكل همها الانستغرام

      بس الحمدلله استانست بكم التعليقات على البوست 🙂

  9. فطومة says:

    كل شي سويته بروحي … السينما و المطعم و القهوة حتى حفلات المجلس الوطني للثقافة مرات اروح بروحي اذا ما لقيت احد معاي و حتى السفر اسافر مرات بروحي اذا الظروف حكمت و اكتشفت ان احلى شى ان الواحد ما يرتبط مع احد و يمشي اموره اذا الكل مشغول و لقى احد يطلع معاء

    • PinkGirl
      PinkGirl says:

      ماشاء الله عليج
      ماكو احلى من الرفقه والروح تبي الارواح لكن الواحد مايوقف حياته على احد لازم تمشي اموره

  10. SaNaa says:

    مثل ما اليمعة حلوة .. هم لما تقضين وقت بروحج له متعته الخاصة … رحت ذي هوبت الجزء الثالث بروحي.. و احيانا احب اتسوق بروحي بس ما جربت اقعد بكافية أو اكل وجبة في مطعم بروحي 🙂

  11. عبور الافق says:

    مممم احب كل بوستاتك كلها كلها

    صراحة ماعندي تعليق بهالبوست الا ياليتني كويتية وبس
    والله حياتنا يابنات السعودية صارت لاتطااااااق

    سامحيني البوست هيج مشاعري

    • PinkGirl
      PinkGirl says:

      بعد قلبي حبتج العافيه
      ليش ياحافظ الكويتيه ماتفرق عن السعوديه
      عندي رفيجات سعوديات يروحون ويردون ومستانسين بحياتهم
      لازم انتي تعيدين مسار حياتج علشان تستمتعين فيها

  12. Nasser says:

    جربت كل شي بروحي و احس بالعكس محد يشوفني ك شخص مينون لول

    بالعكس احس لها نكهه اصلا ومافيها ازعاج -_-

  13. HAYA says:

    انا مو بس اطلع برووحي انا وصلت مرحلة استانس مع رووحي لووول احس هدوء وراحة وماكو التزام بشخص او وقت معين هههه

    • PinkGirl
      PinkGirl says:

      حلووو شعور استانس مع روحي صح 🙂
      الواحد من وقت لي آخر يحتاج يقعد مع نفسه لكن مانستغنى عن الاهل والصديقات

  14. HAYA says:

    مع ان على فكرة قبل 5 6 سنوات كان قلبي يعورني وينكسر خااااطري لما اشووف احد قاعد بمطعم وياكل بروحه لووول

  15. Maryam says:

    انا استمتع بالطلعه بروحي سواء سوق او مطعم او سينما. بس صراحه افضل الاماكن الهاديه اذا كنت بروحي. الكتاب احلى صديق بهذي الاوقات

  16. Danderma says:

    اطلع و جنه العيد اصلا ما اعرف اتسوق و اشتري شي الا بروحي و طفارتي اتسوق مع احد او اقعد انطر الناس تقايس

    السينما هم مو مشكلة ياما رحت بروحي و من يبدي الفيلم محد يدري عن احد…. هم القهاوي اروح انا و كتابي و لابتوبي و استانس بروحي

    • PinkGirl
      PinkGirl says:

      صاجه والله شعور خايس لما تنطرين احد يقايس يروح الوقت على الهبني
      السينما اتينن خو كرسي وبتجابلين الفيلم مو ضروري احد وياي

  17. dana says:

    عادي واستمتع بعد .. خصوصا لمن قضيت فترة طويلة برا تعودت على هالشي بشكل يومي بحكم الظروف و الاجانب شحليلهم مالهم شغل باحد اساسا و لمن رديت الديرة صار عادي عندي بزود بس طبع فيني مااحب المكان الزحمة فمايفرق معاي اقعد و ادي معاي مجلة تلفوني اي شي استمتع بوقتي بروحي .. وبالنسبة لنظرة الناس الناس تسوي صح تسوي غلط ماتطلب رايي فليش انا استحي منهم خصوصا ان لا حرام و لا عيب و لا غلط ؟

    • PinkGirl
      PinkGirl says:

      صاجه والله لاهو عيب ولا غلط
      بالعكس عندي هالشي يدل على الثقه بالنفس والاعتماد عليها
      والاجانب عندهم جوانب حلوه وايد مع الاسف ماناخذ الا السيء منها ونخلي الزين

  18. me says:

    السالفة مو سالفة ناس تطالع لكن المساله يبيلها تعود وانا ما تعودت استانس بروحي لان وناستي مربوطه بمدى قدرتي على اسعاد الاخرين

  19. لولو says:

    السوق ماحب أروح الا بروحي اخذ شغلي وأطلع ،، ،، والسينما جربت بروحي والقهوة كذلك ،، وياريت الناس تتقبل الموضوع عادي ،، وماتسنمكر ياحلات الاجانب مالهم شغل بأحد الا ربعنا

  20. Sana says:

    اي والله الجمعه وناسه بس بعد احيانا الواحد ماله خلق احد وبالعكس ممكن اطلع واتسوق واكل ماعندي مشكله قبل اطلع وانا متفشله شويه وما اكذب عليج الحين احيانا يجيني هالشعور بس غالبا لا.

  21. mariam(LoVei) says:

    اي واايد احب الهدوء واسويتها، اصلا لي طلعت بروحي اسوي انجاز واخلص كل مشاويري والي ناقصني

  22. شيماء says:

    من جم يوم كنت مع اختي ومرت اخوي طالعين وشفنا وحدة قاعدة بريحاتها عاد علقوا على هالموضوع انه شلون تقعد بروحها بمطعم
    مع اني مااحب اطلع بروحي بس صاجة احس الواحد يحتاج احيانا لهشي

  23. Emynice says:

    تصدقيين طيوووب ودي اسوي نفسج بس استحي .. مرات ودي اطلع واقعد بروحي بكافيه ولامطعم بس احس صعبه ماتشجعت للحين

  24. *M_E says:

    إذهب بنفسك واستانس بوحدتها… تبقى سعيدا اذا ما كنت منفردا

  25. sheikhat ahalha says:

    بصراحه الموضوع عجبني وقاعده أحاول اني اتعود عليه خاصتا واني كنت متعوده اطلع مع امي الله يرحمها ويغفر لها فقداني لها خله فراغ كبير بحياتي لانها كان محور حياتي و قاعده أحاول اني اطلع بروحي بس أحيانا احتاج أتكلم مع احد عن موقف او عن تجربه او عن أي موضوع يصير

    • PinkGirl
      PinkGirl says:

      الله يرحم الوالده ويغفر لها
      اكيد عندج اهل وصديقات تقدين تشاركينهم لكن بالاوقات اللي ماتلقين فيها احد تقدرين تعتمدين على نفسج بالطلعه وتستمتعين فيها حتى لو بروحج 🙂

Comments are closed.