وداعاً ٢٠١٣

Welcome-2014-Bye-Bye-2013-Wallpaper
بكل سنه نودع السنه القديمه بكل ما فيها من لحظات شي سعيد وشي حزين ونستقبل سنه يديدة وبقلبنا امنيات يمكن تتحقق ويمكن نرد نخشها بقلوبنا لسنوات وسنوات وتبقى مجرد امنيات

سنه ٢٠١٣ كانت سنه حلوه رغم اني فقدت فيها عمه كانت بمثابة ام عانت وايد مع المرض وصبرت واسأل الله العظيم ان يكون هذا الابتلاء وصبرها عليه تكفير عن سيئاتها وسبب لدخولها الجنه يارب .. رحمة الله عليج يا عمتي سبيجه والله اني فقدتج خصوصا لما اقبل عليج وتتحلين علي وتلملميني وكانت تناديني تميرتي :ـ( الله يرحمها

سبحان الله ربي ياخذ لكن بنفس الكفه يعطي بهالسنه تعرفت على ناس مادري شقول عنهم رغم قصر مده المعرفه لكن تآلف الارواح شي مو طبيعي يمكن انا محظوظه من هالناحيه ربي يرزقني على نيتي ويمكن لأن امي كانت الله يرحمها وايد تدعيلي ويمكن حتى ابوي الله يحفظه

تعرفت على بدريه هالسنه وما اقدر اقول اكثر من انه زادت خواتي اخت وتعرفت على نجلا واول مره احس باحساس انه عندي اخت اكبر مني لاني باختصار الكبيره بس لما اقعد جدام نجلا ولما تكلمني احس اخت كبيره تخاف علي وتحاتيني وتسأل عني وتعرفت بعد على ناس وايد منهم نوف وبدريه ونوره وساره وحصه ودلال ومروه بن صغير و صيته وسوزي وهلل و وايد والله يسمحولي اذا ماذكرتهم وآخرهم الغاليه بشاير اللي من الناس اللي تدش القلب والقعده معاها شي ثاني تبارك الرحمن الله يحفظج يا اطيب بشه :)

في هالسنه صافي صديقتي الغاليه يابت فطومه الحلوه عقب ماعيزنا ننطر ياهل ١٠ سنين ادري انا فضيحه هههههه  ويافرحتنا فيها الله يحفظها ويبلغ اميمتها فيها 

صديقاتي القديمين الحبيبين انتوا بالقلب واهلي الغاليين انتوا الروح والريه

قراء المدونه اليدد والمخضرمين اللي يعرفوني عدل من ايام منتدى كويتيات لو ما متابعتكم ما حققت المدونه هذا النجاح ربي يحفظكم ويجعلها سنه جميله عليكم

انتهت السنه والف الحمدلله كان آخرها لحظات جميله ناقصها وجود امي الغاليه ربي يرحمها ويغمد   روحها الجنه وعمات كانوا امهات رحمة الله عليهم 

وداعاً ٢٠١٣

اهلاً ٢٠١٤

كل عام وانتوا بألف خير

This entry was posted in General.