مطعم ورد الزعفران في مجمع الكوت

٢٠١٣١٠٢٥-٢٢٢٥٣٠.jpg
كل سنه ننطر الجو يتعدل علشان نقدر نقعد برا في حديقة البيت والقهاوي والمطاعم وعلى البحر وتحلى قعدات المباركيه وغيرها
هالويك اند كان في بالي اروح الكوت من زمان مارحت واحب قعدتهم صوب النافوره
كانت روحتنا حزة غدا فقلنا نتمشى ونقرر وين ناكل
عاد واحنا نتمشى برا جهة النافوره لقينا مطعم اسمه ورد الزعفران يقدم مأكولات ايرانيه وطريقته وايد شعبيه نفس مطاعم المباركيه قلنا يالله نجربه

٢٠١٣١٠٢٥-٢٢٢٩٣٠.jpg
فتحنا المنيو وكان فيه انواع من المشويات والمقبلات والسلطات المعروفه عند هالمطاعم وبعض العصاير

٢٠١٣١٠٢٥-٢٢٣٠٥٢.jpg
ويابوا العده
الخضرا والبصل والليمون مع الماي

٢٠١٣١٠٢٥-٢٢٣١٥٣.jpg
قبل لا اكمل باجي الصور وعلشان احطكم بالصوره
اللي يشمأزون من هالاماكن الشعبيه لااااا يروحون
انا اموت على المباركيه وماعندي اي حساسيه ووساوس من المطاعم اللي هناك
بس اليوم مع ان المطعم بمجمع راقي بس شوي تحسست وماظن اعيد التجربه مو علشان مو نظيف بس في بعض الاشياء ماحبيتها وبذكرها
هذا الخبز وصل فريش بس السله وايد كانت وصخه 🙁 بس كلينا قلتلكم انا افوت شوي هههه

٢٠١٣١٠٢٥-٢٢٣٦٠١.jpg
انا طلبت عصير ليمون بنعناع كان زين

٢٠١٣١٠٢٥-٢٢٣٨٥٤.jpg
مادري كنا طالبين صحن حمص او صحن زيت زيتون هههههه المهم وخرنا الزيت وكلينا من الاطراف

٢٠١٣١٠٢٥-٢٢٤٢٠٧.jpg
الشي اللي ماحبيته وانا اساسا ما اواطنه انه احد يعطيني صحن ولا قفشه او قلاص توه مغسول ويقطر ماي بدون لا ينشفه !
يايب لنا مواعين معدن ترجخ ماي وفوقها الاكل 🙁
ونفس الشي القفاش والشوك
ياريت الاشياء هذي يخلونها بلاستك انظف مثل المباركيه والمعدن بس للتقديم
المهم
هذا صحن مشويات مشكله

٢٠١٣١٠٢٥-٢٢٤٨٠٢.jpg
وهذا عيش بالزعفران

٢٠١٣١٠٢٥-٢٢٤٨٤٢.jpg
ومرق بطاط

٢٠١٣١٠٢٥-٢٢٤٩١٤.jpg
القعده حلوه والاكل مو شين واللي ناوي يروح اييب صحون وقفاش بلاستك معاه 🙂

3 comments

  1. amna says:

    الله يعطيج العافية..انا أتابع البلوق من فترة.. و و مو من النوع اللي أعلق وايد بشكل عام..بس من زمان ودي أشكرج على صراحتج اللي نادر ما نلقاها..و هذا اللي مميز فيج..و الحلو ان حتى لو انتي مدعوة تقولين رايج بصراحه و بدون احراج من صاحب الدعوة حتى لو مو عاجبج الشي.. أهنيج على هالمصداقية..و شكرا مرة ثانية

    • PinkGirl
      PinkGirl says:

      الله يعافيج حبيبتي
      تسلمين ومشكورة على المتابعه وبالعكس اذا كتبت رايي فهذا يعبر عني شخصياً يمكن الناس تخالفني فيه لكن اسمها مدونة لتجارب شخصية 🙂
      واكيد بعد القصد منها الفايدة للجميع الزبون وصاحب المشروع بعد
      وايد استانس بتعليقاتكم لالالالا تقطعوووون :*

  2. لولا says:

    نفسك مايهمني شكل المطعم اهم شي الاكل و النظافه

    احب لما ازور الكويت اكل في المباركيه خصوصا مطعم الشمم شي
    لا يعلى عليه ( قولي لهم يفتحون فرع في الرياض )

    بس سالفه الملاعق وهي تقوطر مويه ما ينسكت عنها

    لو مكانك بدفع الي جهز وبطلع

Comments are closed.