My Trip to Turkey – Istanbul Day 2 رحلتي الى تركيا – اسطنبول اليوم الثاني

istanbul2day1

اللي ما شاف البوست الاول – اضغط هنــا

ثاني يوم قعدنا ونزلنا نتريق في مطعم الفندق

الريوق كان مو واو على اسم الفندق لكن يمشي حاله والحمدلله على النعمه

istanbul2day2istanbul2day3

الوايرلس كان مو مفتوح ذاك اليوم وطلبت منهم الباسوورد وعطوني الكرت

istanbul2day4

بعد الريوق قررنا نروح افخم مول عندهم وهو

Istinye Park

İstinye Bayırı Cad. No: 73 Sarıyer

 

وايد عجبني تصميم المول حاطين البوتيكات الكبيرة برا مع بعض القهاوي مثل جي جي ولادوريه وارماني وجدامهم مدخل صغير يدخلكم سيدا على سرداب المول وراح تلاحظون ان بكل المولات حاطين اجهزة الكشف عن الجناط والاغراض وتفتيش شخصي    

اغلب الماركات موجوده مثل ديور, شانيل, فيندي, برادا, كريستيان لابوتان, دولجي غابانا, ميو ميو, بوتيغا, بيربيري, قوتشي ولوي فيتون وموسكينو, رالف لورين وغيرهم

istanbul2day5istanbul2day6istanbul2day7

شكل قهوة GiGi  وايد عجبنا وقعدنا نشرب قهوه فيها بالجو الحلو قبل لا نكمل التسوق داخل المول

istanbul2day8istanbul2day9istanbul2day10

المول وايد كبير 4 طوابق وفيه وايد من المحلات والقهاوي والمطاعم المعروفة وهم فيه ماركاتهم ومحلاتهم التركية

من المحلات الموجوده ماكس مارا, ماركس اند كو, مايكل كورس, فورلا, سيفورا, H&M, C&A, , زارا, بريشكا, غاب, مانجو, مارك سبنسر, بودي شوب, ناين ويست, لاكوست, بينكو, اويشو وغيرهم

وعندهم ماركة ملابس اسمها NU  وايد حلوة للمتحجبات اللي يحبون الطويل والواسع .. بعض القطع تلقونها بالكويت عند دار يوشه في برج جاسم

والقهاوي عندهم ستاربكس ونيرو وكاريبو وغيرهم وحتى شيك شاك تلقونه وطبعا مطاعمهم وبعض مطاعم الوجبات السريعه المعروفة

اللي بيشتري من الماركات خل يحط في باله يسوي التاكس فري بس هاااا التاكس ما يعطونكم اياه الا اذا شافوا البضايع يعني لازم قبل لا تدخلون الجناط يشوفونهم وراح اتكلم عن هالشغله في اليوم الاخير

istanbul2day11istanbul2day12

طلعنا من استينيا  الى مجمع مادحينه لنا بعد اسمه جواهر

يحليلهم بالشارع يتمشون بين السيايير يبيعون ماي بارد

istanbul2day13

Cevahir

Citibank Cevahir Alisveris Merkezi ATM, 34330 İstanbul

المول 5 طوابق راهي بس مادري يمكن عقب استينيا طاح من عيني ماحبيته ومقموت شوي

المحلات اللي موجوده – اضغط هنـــا

istanbul2day14

هالكورنر وايد عجبني فيه سوالف تشوق بس مع الاسف خفت يتكسرون و ماخذيت شي منهم 🙁

istanbul2day15

هالكشك عندهم منتجات هيلوكيتي وبيتي بوب .. ما كنا بنوقف نشوف لكن اللي تشتغل اسمها سونقو خفيفة طينة قامت تحاجينا بالعربي المكسر ويحليلها باسلوبها خلتنا نوقف ونجرب ونشتري بعد .. حبيت الاي لاينر اسود وثابت

istanbul2day16

وهم في كورنر يبيعون ملبس نخي على انواع مالحه وانواع حاليه وايد حلو جربوه

istanbul2day17

ختام اليوم والعشا كان في مطعم اسمه

Akdeniz Hatay Sofrasi

هالمطعم رحنا له بعد ما مدحه احد التكاسي

والاشياء اللي ذقناها للامانه مو واو مع ان عليه زحمه وشفنا كويتيين بعد بس مبين اول مره حالهم حالنا
احسن شي عندهم ان المنيو عربي واللي يتكلمون هم في منهم عرب

istanbul2day18

حاطين ركن يبيعون منتجاتهم

istanbul2day19istanbul2day20

اغلب مطاعمهم يكونون مزهبين المقبلات وتييكم الصينية وتختارون الاطباق اللي تبونها

istanbul2day21

اخترنا بابا غنوج ومتبل كانوا زينين

istanbul2day22

وهذا نسيت شنو بالضبط

istanbul2day23

خبزهم كان طيب

istanbul2day24

اللبن عندهم كان لذيذذذذذذذذذذذ ومع الثلج عقبها مال نومة 😛

istanbul2day25

اللي يمنا كانوا طالبين دجاج بالملح عباره عن دياية كامله محشية بالعيش والبهارات ومغطينها بملح صخري يابوها يمهم وشبوا فيها النار وبعدها كسروا الملح عنها وطلعوا الدياية

كنت قارية عن هالاكلة وما سمعت احد مدحها يطلبونها بس للشكل مع ان اغلب اللي يمنا من اتراك طالبنها

istanbul2day26

الكباب العادي كان طيب

istanbul2day27

وطلبنا بعد شي اسمه كباب الجرة وهي لحم خروف مع البصل والثوم مضاف عليها صلصة خاصه فيهم

نفس طريقة الملح يابوا الجرة يمنا وشبوا فيها النار وبعدين كسرها وطلع اللحم

بس الطبق مقلب ما كليناه 🙁 الله يزيد النعمه

والله مادري احنا ذوقنا صعب ولا الناس ماتعرف تاكل 🙁

istanbul2day28istanbul2day29

وعقب ما خلصنا نفس اغلب المطاعم بتركيا الشاي يكون ضيافه منهم ويابولنا معاه خوش بسكوت كان لذيذ يمكن احلى شي ذقته عندهم 😀

istanbul2day30
هالبوست يمكن ما فاد الرياييل بشي لأنه اغلبه سوق ومطاعم بس ان شاء الله اليوم الثالث ورحلة بورصة تفيدكم اكثر 🙂

9 comments

  1. Minty says:

    الديايه ام الملح لذييذ حسافه ماجربتوها
    ووجرة اللحم جربناها في مطعم الملك
    كانت لذيييذه
    يمكن بهالمطعم مو زينه

  2. Bashayer says:

    أول مره اكتب كومنت بصفحة بلوقر بس من كثر ماتحمست ناطرتج

  3. aisha says:

    مد لله على سلامتج ..
    والله يعطيج الف عافية على هالتقرير الحلو
    بس بغيت استفسر منج عن الاوضاع بتركيا وتحديدا اسطنبول شلون صايره امان ؟؟؟
    ولا ليلحين لوية ومظاهرات وجذي؟؟
    لاني قاعده احاول اقنع اهلي نسافر وبنفس الوقت خايفه يكون الوضع مو زين ويلوموني بعدين؟؟
    ياريت تفيديني خصوصا اذا بزور شارع الاستقلال اقدر اتسوق ولا لأ؟
    وصج مكسر ووصخ وكله متظاهرين
    فيديني الله يعافيج ومشكورة مقدما …

    • PinkGirl
      PinkGirl says:

      الله يسلمج ويعافيج حبيبتي
      الوضع ممتاز ماكو شي الحمدلله يمكن تقسيم اهي اللي يصير فيها مظاهرات وشرطه فما رحنا لها غير جذي كل مكان امان
      شارع الاستقلال اتوقع بتقسيم واحنا مارحنا والله

  4. Badria says:

    السلام عليكم

    حبيبتي بغيت اسأل الماركات ارخص هناك يعني تنصحين اشتري منهم ولا اغلى من الكويت ؟

    ويعطيج العافيه خووش تقرير

    • PinkGirl
      PinkGirl says:

      وعليكم السلام
      الله يعافيج حبيبتي
      يفرق بس قليل مو وايد بسبب وجود التاكس بس تقدرين تسوينه اوراق التاكس وتستلمين المبلغ بالمطار
      ساعات يسوون سيل في البوتيكات واسعارهم وايد حلوه

Comments are closed.