وطارت الطيارة التركية من الكويت الغاليه باتجاه تركيا وتحديداً اسطنبول
بهالفترة وقبل لا نوصل خل اقولكم سالفة هالسفرة .. اول مره بحياتي اسافر وانا مغمضة لا ادري عن حجوزات ولا مناطق ولا اماكن ولا شي بس انه بنروح تركيا لأنه السفرة صارت بتخطيط يوم واحد وربي سهل واختي سوت حجوازاتنا كلها بليلة وكل اللي سويته عطيتها الفلوس وليلحين والله مادري عن الحسبة شلون قايلة المهم التوتال ههههه علشان جذي لحد يسألني عن الاسعار بخصوص التذاكر والفنادق عندكم اكثر من موقع مجرد تحطون التاريخ ويطلع لكم السعر واكيد بالانترنت اقل من السفريات بوايد
بعد مايقارب 4 ساعات الا ربع وصلنا الاجواء التركية والحمدلله
بخصوص فيزا تركيا تقدرون تسوونها بالانترنت بدون لا تنطرون دور بالمطار ومع الاسف احنا ما كنا ندري عن هالشي وانصدمنا انهم ما يقبلون الليرة لتخليص معاملة الفيزا لازم دولار او يورو وما كان معانا فأضطرينا نستخدم الماستر كارد وقيمة الشخص 20 دولار مدتها 3 شهور
Link هذا الموقع الالكتروني لطلب الفيزا
في اسطنبول مطارين احنا كان وصلونا لمطار اتاتورك
اول ما خذينا جناطنا فكرنا بكروت الموبايل صرنا مانقدر نستغنى عن التكنولوجيا 😛
مرينا فودافون خذينا خط بقيمة 110 ليره مع 1 قيقا انترنت سهالات وخدمة ممتازه وسريعه والانترنت تبطل بعد ساعتين واستخدمته طول فترة السفره ما زدت عليه فلوس كلش ومكالماتي كانت عن طريق برنامج الفايبر الله يوفق من سواه 🙂
طلعنا برا صوب التكاسي ولقينا سيارة راهية مثل الباص بس مو تكسي واتفقنا معاه على 30 ليرة و خذانا الفندق اللي كان قريب من المطار
وهذي صور من مطار اتاتورك لي فندقنا
Wow Airport Hotel وصلنا لفندقنا
الفندق لاباس فيه 4 نجوم بس كلش مايمة شي يعني ماكو تمشي بس مجابلة برجر كينج ويمه كافيه ثاني بقعده خارجية وداخليه
الاجراءات خذت وقت والله مو سريعين بس وجود الوايرلس المجاني في اللوبي شفع لهم ههههه
وهذي الغرفة مرتبة والروم سيرفس كانوا خدومين وبشوشين وايد
واول مادخلت كنت بشحن التلفون ولقيت انه فيشة الكهربا ام راسين 🙁 وانا يايبه ام ثلاث كلمت الروم سيرفس ووفرولي القطعه مجانا للاستخدام
لالالالالالالالالازم تحطون في بالكم سالفة الفيشة
هذي القعده الخارجية للكافيه اللي مجابل الفندق
صلينا وتوكلنا على الله المول اللي مو بعيد عن الفندق لكن مع الاسف اكو شق نهر فمايصير مشي لالالازم تكسي وياخذ 10 ليرات للتوصيل
Airport Outlet Center
المول 6 طوابق ومختص بالمحلات الاوت ليت تلقون بعض المحلات المعروفه مثل مارك سبنسر وبنيتون وغيرها بس الاغلب محلاتهم اهم وبصراحه كل شي دااااااااثر مايسوى العنوه وهم فيه سينما واكيد بلغتهم التركية علشان جذي مادخلنا افلام هناك وعندهم بعد صالة تزلج
هالمحل استانسنا عليه عنده خرابيط تشوق بس الاسعار موهينه
كنا ميتين يوع فأخترنا مطعم من المطاعم الموجوده في المول
اسمه Bursa Kebap Evi
قلنا نجرب الشاورما اللي كل من يتنطع بشاورمة تركيا
اختي قالت نطري ناخذ وحده بيني وبينج ونشوف اذا لذيذة نطلب على الراحة لأنه الشكل مو عاجبها وايد قلت يالله وبنت خالي طلبت هالشي اللي تحت مادري شسمه الله يزيد النعمه وتحته عيش والباجي طلبوا ماكدونالدز
باختصار ما كملت نص الشاورما 🙁 الله يزيد النعمه
واللبن عندهم بتركيا شي مقدس يموتون عليه وهالماركة كان طعمها نفس كي دي دي اللبن الاخضر المعلب طويل الامد مااالح
وانا اتمشى تحت حصلت كافيه مادو اللي كل من يمدح بكنافته فقلت يالله نجرب نعوض الغدا اللي ماكليناه
قلتله ابي كنافه قال ماكو 🙁 شهالحظ يالله ما عليه طلبت بقلاوه وايس كريم فستق مع القهوه التركية ههههه لا تضحكون علي هم ما كملتهم وحقدت على اللي قالوا اكل تركيا طيب لكن وراي 6 ايام نشوف شيصير فيها
بعدها ردينا الفندق ريحنا شوي وخذينا تكسي وصلنا لي مول Kapa City
وهذا عنوانه Zeytinlik Mah. Fişekhane Cad. No:7, Bakirkoy
وايد اهون من المجمع اللي طاف على الاقل المحلات اذرب واغلبها معروف بريشكا واكسسريز ولوكسيتان وتومي هلفيقر وسي اند ايه وغيرهم
وفيه مطاعم وقهاوي وسوبرماركت ميقروس
واللي بيروح تركيا بيلاحظ انه كل المولات تقريبا والمرافق اللي فيها زحمه وسياح تلقون فيها كراسي للمساج 🙂 تحطون ليره وحده ويشتغل المساج لمدة 3 دقايق خوووش شي صراحه
هالمحل Flormar للمكياج شفته بالمجمع واللي تشتغل حبوبة اسمها فاطمه وايد خدومة
البنات بالانستغرام يقولون الماركة موجوده بمراكز التجميل والمباركية بالكويت بس بعض البنات يقولون مو كل شي موجود
المراد ترى الماركه الحمر ملوتها وايد حلوين ويتمون فترة طويلة حتى لو شربتي وكليتي واسعارهم وايد حلوة مايتعدون ال3 دك وشي اقل بعد وهم كريمات الايد عندهم حلوة خذيت منهم
هالجمعية امووت عليها موجوده بجنيف بس اللي باسطنبول تختلف شوي مالت جنيف احلى
وشفت ستاربكس فدشيت اتفقد الجديد واللي غير عنا عندهم صورت جم صوره وطلعت
وطلعنا نتمشى بالشارع اللي فيه المول
بأغلب الشوارع تلقون اللي يبيعون صمون سميط و ذرة ودندرمه (ايس كريم) وغيره من اكلهم وبالشتا تلقون عربانات تبيع كستنه
لا تخترعون اذا لقيتوا يمكم حشا السامع كلاب لايثه بالشوارع شي مو طبيعي كل مكان كلب ونفس الشي القطاوه بس قطاوتهم يخرعون يخزون واذا قربتي عادي تطلع لج انيابها وتلحقج مثل ما صار فيني عقبها بجم يوم 🙁 خلتني اطامر بنت اللذينه
وختمنا اول يوم بمطعم مادحينه حق بنت خالي شوي بعيد بس يستاهل
Develi Restaurant Florya
وهذا العنوان Çiroz Mevkii İstanbul Asfaltı Petekevler içi Florya/İstanbul (Florya Büyükşehir Sosyal Tesisleri Yanı)
والله المطعم مرتب واكشخ مطعم دشيناه بتركيا بصراحة واخترنا نقعد برا بالهواء الطلق خوووش قعده
ضيفونا بالخبز الزين والجبن الابيض مع الجوز والزبده
طلبنا اكثر من شغله نسيت اساميهم بس الشي الاحمر اللي بالصورة بيديان مع طماط كان طبق القعده واااايد لذيذ والمشويات طيبه خصوصا تكا اللحم والدياي اما الحمص مو شي لا تطلبونه
وبعد الاكل يابولنا ضيافة جاي تركي
وطلبنا بقلاوة ما شاء الله كل وحده شكبرها فتقاسمناهم كل 2 بوحده وعلشان خالتي ما كلت حلو الويتر يحليله طار ياب لها صحن فاكهه مشكله مع ديب ككاو قالها علشانج وفري
هذا الويتر الطيب اللي ماقصر معانا يحليله
وهذي ادارة المطعم لما شافوني اصور قالولي صورينا يحليلهم عاد ماكسرت بخاطرهم
وهذا يومنا الاول خلص والحمدلله ونشوفكم على خير باليوم الثاني تصبحون على خير 🙂
موضوع رووعه وبوقته والأروع اسلوبج واهتمامج بأدق التفاصيل.. يعطيج ألف عاافية
الله يعافيج حبيبتي وان شاء الله تستفيدون منه 🙂
تقريرجج عجييب
عآد آختي تمددح الشورمآ يمككن على حسب آلمطعم
صور الجلابة عزج الله تخرع لو انا جان لميت العالم بصراخي
آخخر مطعمم شكله خورآفي
ننطر آلجززءء آلثـاني و قوآجج الله
الله يقويج حبيبتي
طريقة شاورمتهم جنها روست بيف كلش موشي مكرم النعمه
اي والله المطعم الاخير كان وايد حلو يسوى الروحه له
قواج الله بدايه حلوه
بالنسبه للجاي هذا لازم بتركيا 🙂
بس الفيزا اللي اعرفه انه تقدرين تسوينها بالمطار ب ٢٠١٠ سويتها بالمطار جان تغير النظام الحين؟ الله اعلم
اما الاكل شي طبيعي في اللذيذ وفي العادي والظاهر للحين طحتوا بالعادي هههه
الله يقويك
اي صح الفيزا سويناها بالمطار بس لازم يكون معاك يورو او دولار ما يقبلون عملتهم الليرة
والله الاغلب ما عجبني الاكل يازين اكل الكويت
تركيا جنة من جنان الرحمن على الارض ..
تقرير رائع ومفصل عن تركيا
تركيا جميلة ومناظرها خلابة 🙂
شكرا لمتابعتكم
يعطيچ العافيه خوش تغطيه ، بس اشلون الجو في اسطنبول هالأيام ؟؟
الله يعافيج يارب
هالايام مادري لأني حالياً بالكويت لكن قبل لا ارجع من 10 ايام تقريبا كان الجو حار
لازم اتروحين محل اسمهاذا مي غلطانة gulu gulu موجود في اسطنبول يسوون احلا بقلاوة عجيبة لازم اتجربينها 🙂
ان شاءالله المره الياية لأني رديت الديرة من اسبوعين 🙂
الله يعطيج العافيه .. انا قاعدة ادور مواضيع تركيا واسجل حق لي سافرت ان شاالله
بس ماعليج امر موقع الفيزا مايشتغل
الله يعافيج اختي جم تكلف الروحه 12 يوم؟
يعتمد على ميزانيتج والاماكن اللي بتروحين لها وتسكنين فيها وجم شخص انتوا !!
روحي السفريات وشوفي شينصحونج فيه واذا عندهم عروض
واذا عجبتج الفنادق اللي كتبت عنها تقدرين تسألينهم عن الاسعار لانه كل سنه اكيد الاسعار تفرق
Comments are closed.