The Darek Room Restaurant

اليوم تجربتنا كانت مختلفه كلياً عن اي تجارب سابقة .. صج تجربة مطعم لكن مطعم غير

The Dark Room

الغرفه المظلمه .. اي بكل ماتحمل الكلمه من معنى ظلمه خرمس ايدكم ما تشوفونها 

المطعم ليلحين ما فتح وهذي كانت مجرد تجربه للمكان بالجو الجديد والاكل اللذيذ من ايد الشيف عادله الشرهان

فكرة المطعم انه يعطي تجربه للانسان ان يجرب حياة الكفيف ويعتمد على حواسه الاخرى بمعرفة ما يدور حوله 

يلمس ما يقدم اليه .. يشم الاكل ويستطعمه واكيد حاسة السمع ايضاً بتشتغل هالفتره اكثر

المطعم موجود في نيويورك, لندن, باريس واول مره في الشرق الاوسط

وصلنا برج جاسم وكان بانتظارنا السيد حمد العلي مع نظارة الرؤية الليلة (قوقلز) وهالنظاره يلبسونها الويترز علشان يشوفون في الظلمه

تكلفة الدخول للمطعم 15 دك للشخص شامله الشوربه المقبلات الطبق الرئيسي والمشروبات 

قعدنا بغرفة الانتظار وقدمولنا مكسرات وعصير 

والمفروض وقت الافتتاح الرسمي يكون اختيار الاكل من المنيو في هالغرفه قبل الدخو

ولبسونا صداري ههههه صج نحتاجها اذا ماراح نشوف وظلمه التخبيص بيشتغل

بعدها عطونا صندوق امانات نحط فيه كل متعلقاتنا لأنه ممنوع ندخل المطعم وعندنا اي جهاز فيه ليت مثل التلفونات وغيره 

وعلشان تجربه كامله حطينا اغراضنا وكاميراتنا في الصندوق وقفلوه وعطونا المفتاح

القائد حمد جاهز وانطلقناااا 

تخيلي ممر طويل ما تشوفون حتى ايدكم من الظلام الحالك حمد ماسك عزيز زوج دندرمه ودندرمه ماسكه جتف عزيز وانا ماسكه جتف دندرمه مسوين قطار ورا حمد لوول

ليما وصلنا عند الطاولة مسكت ايدي الويتر وقالت لي المس الكرسي علشان اعرف اقعد 

الطاولة كانت فاااااضيه ما عليها شي 

بما ان الحال ما نشوف وفقدنا موبايلاتنا ولا اكو انستغرام فالشي الوحيد انه نسولف وانصحكم تاخذون احد ما شفتوه من زمان علشان تلقون موضوع تتكلمون فيه 🙂

وفجأه تحسون فيه صوت قرقعه اممممم الترولي مالت الاكل وصلت سمعناها 🙂

اول الواصلين قلاص البيبسي وثاني الواصلين شوربه كانت شوي بارده الظاهر خايفين تنكت علينا اول فمو مخلينها حااااره

وللامانه مادري بالضبط شنهي فيها مشروم فيها بصل حسيت بخسه داخل حلجي ههههههههه المهم شوربه وكانت زينه لو ما انها بارده واكيد هالشي تجربه وقت الافتتاح غير 🙂

ثاني طبق مقبلات اهو الروزيتو بولز لا تسألوني شلون استخدمت الشوكه والسجين ابدااااع فقصت الروزيتو فقاص وعليه بس كان لذيذ

بعدها وصل الشريمب بولز .. ربيانه لذيذة عليها بقصماط .. اقولكم شي هالمره استخدمت ايدي ماعرفت اقصصها بالسجين .. دام محد يشوف الحياه سعيده ههههه

وآخر شي ياتني الملكه لازانيا شي محصلش وااااااااااايد عجيبة وحاااااااره والجبن ساااااااايح استمتعت فيها وانا ما اشوف 

عقب ما خلصنا طلبنا من الويتر توصلنا الباب وماقصرت يحليلها وصلتني وبس شفت الليتات العيون قامت تدمع وتعورني بس لمده دقيقتين والوضع رجع طبيعي 

الف الحمدلله على نعمة البصر والله شي عظيم ربي معطينا اياه 

شكرا شكرا دارك روم والله تجربه فريدة استمتعنا فيها جدا جدا 

وبطلعتنا اكتشفنا انه كانت يمعنا الحلوة بسمه السعيد وهي فنانه تشكيليه كفيفة شاركت بعدة معارض وحصلت على عدة شهادات تقدير 

يا حلوج يا بسومه :*

The Dark Room is Located in Burj Jassim, Basement

Twitter & Instagram @DarkRoomKW