مخبز الصباح

مخبز الصباح معروف من عمر .. يدتي الله يرحمها كانت تودينا هناك قبل كشتاتنا بالاحمدي او بالبر ناخذ منهم كيكه كبيـــره تسميها الله يرحمها كيكة المسند

الكيكة مغلفه بورق بني وفوقة نايلون وفوقه الورق البني اللي قبل نستخدمه في الاقتصاد المنزلي .. يحلوها الكيكة جنها هدية 

المهم روحتي هالمره مخصوص حق هالكيكة وقلت مره وحده اصور لكم المكان اللي من الطيبين جداً

شوفوا الكيك شحلوه 🙂

وهالكيك اللي عليه طبقة سكر وردية معروف بعد وانصدمت انه وايد ما يعرفون انه يتوزع على البقالات وبعض الجمعيات من مخبز الصباح

عنده فطاير جبن وزعتر .. 100% شكل وريحة فطاير ااااااااااول ملوت المدرسه حده حده من الطيبين لازم تجربونه عجيب

انواع وانواع من البقصم

ويحليلهم مزهبين كيك للسنة اليديده 🙂

عمر ياحليله صارله 40 سنه بهالمكان عسى الله يعطيه الصحه والعافية

وخذينا الكيكه وزهبنا الحليب 🙂

الكيكة خنينه ومع التغمس شي طيب 🙂 الله يرحمج يا يما منيره خنينه وما علمتينا الا على الشي الخنين 

مخبز الصباح في الفحيحيل – شارع مكه

Tel : 23911992