مسرحية بســنا فلـــوس

بنص رمضان راحوا خواتي شباك الحجز لمسرحية بسنا فلوس على اساس نبي تذاكر لحضور المسرحية بالعيد وقالهم المسئول عن الشباك ان التذاكر كلها خالصة لمدة 10 ايام بعد العيد !!! مشاء الله معقول !!! شلون لا اعلان ولا شي وتونا بنص رمضان وطاروا !! ندري جمهور طارق وايد مشاء الله بس مو لي درجه ان تطير كل التذاكر واصلاً طارق زايد عروضة بمعدل 3 عروض يومية ! شي يحير بس رضينا بالامر الواقع وردوا خواتي بخفي حنين

المهم قبل يومين دقت علي بنت خالي ماقصرت وعزمتني عالمسرحية !! نعم ؟! اقولها التذاكر خالصة تقولي صلي على النبي لقينا درجة اولى وبالسطره الرابعه بعد !! وخالتها لاقيه بالسطره الثاني !! تخيلوا وخواتي وعليه نص رمضان يقولهم ماكو تذاكر !! مادري ماكان له خلق يحجز لهم ولا صج التذاكر مخلصة وفجأة الاوادم ردوها ! المهم هذا اللي صار معانا

حضرت المسرحية وكعادة طارق في اخر مسرحيتين قصه يديدة ماميـــش, واحد بخيل (طارق) ومقصر بحق عياله الاثنين (مبارك المانع وسلطان فرج) واخته (هيا الشعيبي) ورافض يزوج اخته لولد خالها (شهاب حاجيه) الا بعد ما يستلم مبلغ وقدره كمهر 

ادوار بسيطة جداً لاحمد الفرج كجار لهالبخيل وامل عباس كجاره ايضا وزوجه لهاني الطباخ ودور كومبارس لنواف نجم واحمد الشمري 

الديكور وايد عجبني كتصميم لبيت قديم هدام وحبيت قفص الحمام .. مهندس الديكور مبدع الصراحه

المسرحيه كان المفروض يكون اسمها (الجعص) وهي كلمة كويتية تعني البخيل لكن مادري ليش غيروه الى بسنا فلوس مع اني اشوف ان العنوان الاول كان اقرب للقصة اما بسنا فلوس كانت اقرب لو كانت الاسره مترفه غنية وتصرف بدون حساب ودخلها يزيد

بعض الصور مأخوذه من الصفحه الرسمية للفنان مبارك المانع في الفيس بوك 

بالنسبة لي المسرحية ونيسه مو واو لكن اهوًن عندي من مسرحيته اللي طافت الطرطنقي 

سوالف وقطات 18+ اشوة وايد خفت بهالمسرحية لكن الطق هالسنه بزيادة الله يعين اللي يمثلون معاك يا بو محمد خف عليهم شوي حرام 

واللي يحبون الطرب والغنى في مسرحيات طارق ترى الكاسور والدنابك موجودين ومعاهم فنان صغيرونو يديد صوته حلو اسمه خالد مظفر

بالاستراحه نزلوا شاشه وعرضوا فيها مقاطع من مسلسل الفلته2 اللي 

MBC اللي راح ينعرض قريبا على شاشة

وبما اني رايحه العرض وانا صايمه كان في بالي ابي شاي او قهوه واستانست انه كل شي متوفر يحليله طارق مو مخلي شي شاي وقهوه كرك وذره وكوكتيل وناتشوز ونفيش وكل خير :D  

واللي ونسني ان كل العمال لابسين وردي جنهم مستقبليني :P  

يا فرحتي بالجااااي :D  

وجابلت الفصل الثاني ولاحظت انه هيا الشعيبي ماكانت هايبر مثل العاده جنها مغصوبه تمثل مالها خلق مووولية يمكن علشان عروض وايد الواحد طاقته تخلص ! لكن شذنبنا :( واهم شي انه ولدها كل ساعه يحليله شاخط عالمسرح وتركض وراه تصرخ عليه !! 

وانتهى العرض لما شب قفص الحمام واحترقت البيزات وخلصت وملصت ويت الدياية وعنفصت :P

والله كسروا خاطري الحمام حاطين لهم دخان خنقوهم وعليه 

وبعد ماخلصنا مثل العام بنصور مع الفنانين .. رحت الكاونتر عند المسئوله عن التصوير جان تقولي لوحدك حتصوري ؟ قلتلها لا بصور صوره جماعيه مع اهلي جان تقول لو لوحدك 5 دك ولو الصوره جماعيه 10 !! لا اله الا الله صارت الصوره دبل عن العام ؟؟؟ ليش؟؟؟ العام صورنا جماعي ب5 دك وتحلطمت بالبوست وهالسنه دبل تحلطم

خوش مهنه والله الصوره ب 10 جني بقدم اخذ مكان هالمصور بمسرح طارق على الاقل يفيدني انا بنت الديره :P  

المهم صفينا بطابور شطووووووله والحمدلله وصل دورنا بعد ما سحنا من الحر وصورنا مع طارق ومبارك وفرحان والباقي ولما سألت المسئولة وين هيا الشعيبي جان تقولي مدام هيا ما بتصورش !! وي علامج يا هيا يا حافظ شهالتغلي ولا بتقلدين هدى حسين بالغرور والنحشة عن جمهورها  !! ترى هالشي ماااااازين ما عطاكم ما عطى شجون يازينها 

المهم طلعت اللي بجبدي وكل عام وانتوا بخير ونشوفكم بتقرير مسرحية طارق السنه الياية اذا الله راد ان شاء الله وناطرين شي يكون احسن يا بو محمد

This entry was posted in Show, Stars and tagged , , , , . Bookmark the permalink.

13 Responses to مسرحية بســنا فلـــوس

  1. Pingback: مسرحية بســنا فلـــوس « Blogs Updates

  2. فوفو says:

    رائع رائع استمري الله يعطيك العافية

  3. it's me says:

    laish katba elnehaya allah ehadeech 7ta law abi aroo7 hawant

    • PinkGirl says:

      لوول السالفه من بدايتها واضحه بخيل ومقصر بحق اهله اكيد بتضيع فلوسة وماراح يستفيد منها بغض النظر وين كانت
      ههههههه وترى من اول المسرحيه واهو يقول القفص والقفص فكلش ما حرقت السالفة :)

  4. خالد says:

    يا اختي ترى هيا الشعيبي ما صورت مع الجمهور مو عشان انه مغروره بالعكس انا اليوم لما رحت المسرحية سألت طارق العلي قلت ليش هيا ما تصور قالي هيا حامل ترى المرأه زين منه تمثل الله يعينه حامل وتمثل باليوم 3 عروض والحين تمثل باليوم عرضين قولي الله يعطيه العافيه زين منه اللي تمثل

    • PinkGirl says:

      الله يعطيها العافية بس كان المفروض تبرر !! قدرت تمثل باليوم 3 عروض واهي حامل وماتقدر تحط كرسي وتصور مع جمهورها

  5. خالد says:

    المرأه لابد ترتاح والمكان مال التصوير ضيج وين المراه تبينه تقعد واهي حامل فرضا احط جاس ضهره تبين المراه تبتلش

  6. Nes says:

    ياترى هل رح يكون في عروض لمسرحية بسنا فلوس في يناير؟ على اساسه بحدد موعد زيارتي للكويت…اتمنى تفيديني

  7. Nora says:

    بس حابه اسؤل بالعيد الوطني بيحطونها اور نو

  8. سالم says:

    الله يعطيك العافيه

  9. شوشو says:

    ترا على فكره المسرحيه سخيفه و ما تضحك ولا بعد في ناس بعضهوم طلعوا من المسرحيه اعتقد 3تربع

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>