Review: @Dallah Kuwaiti Sweets

من المدونات الكويتية المختصه بمواضيع الاكل عموماً Eb6ainiya مدونة

الصور والتقارير والوصف بمدونتهم شي ما صار يعني تدشون وماتيوعون مستحيل 

قرروا اخوانا في بطينية يبدون بمشروع حلويات كويتية سموه ((دلــة)) وبما انهم بطينية وذويقة بالاكل فكنت متأكده انه الحلويات بجودة عاليه خصوصاً بعد ما سمعت مديح كل اللي طلب منهم  

وصلني جيس كبيررر بيج وعليه شعارهم الانيق قبل الفطور بفتره وفيه 5 انواع من حلوياتهم .. يقولون مجابل جيش ولا مجابل عيش علشان جذي طلعت الالبة والمحلبية وعلى طول الثلاجه بدون لا افتحهم والباجي خشيتهم لما يأذن ونبدى نجرب

وبعد الفطور زهبنا جاينا وقهوتنا وجابلنا الحلويات

اول علبة كان فيها بيض القطا .. اهو مثل البسكوت الكويتي بيضاوي ومرشوش عليه سكر بودر وداخله مكسرات 

كان حده لذيذ وترف 

العلبة الثانية فيها الغريَبه .. بيض القطا كانت لذيذة بس الغريَبة كانت اجراااااااااااام احلى غريبة مرت علي بحياتي بدون مجاملة 

والمشكلة لما تاكلون وحده غصب غصب تلحقونها بالثانية 

نتيفاااات زوووغه للتقديم

بالليل لما ابوي شافنا طايحين فيها قال بجرب مع اني مو ماكل غريبة من 40 سنه ! لا تستغربون ابوي مع الشكر والحلو عداوة لوول بس محد قدر عليه الا بطينية وكلوه الغريبة والالبه ويقول ذكروني بألبة امي اول   

كيكة الفستق والهيـل .. ريحتها خنينـــــه الهيل يكفخ فيهااا مشاء الله

مع الجاي والحليب شي ما صار ولا استوى ناطعه خوش كيكة ترفه وتذوب 

ووصلنا للمحلبية والالبــة

محلبيتهم مشاء الله باااارده تبرد على القلب وصاكه وعلى ماي ورد

ال لولو بنت اختي استانست عليها حياتي تقول أبي باااآآآآدد هههههه 

الالبــة كانت واصلتني فررريش فما كانت صاكه ونسيت اصورها لأنه ما جربناها الا على السحور فتسلفت هالصورتين من اختيتي دندرمة :)

البتهم مشاء الله مترووووسة من الهيل والزعفران الزين وطعمها حلو لو انها ما صكت ذاك اليوم لكن هم لذيذة وابوي مثل ما قلتلكم حده عجبته ويقولي الاسبوع الياي نبي وحده ثانية :) حجزولنا وحده من الحين بطينية هههههه

وهذي البطاقة بتكون مفعله مع افتتاح محلهم .. كل ما تاخذون دلة قهوة يختمون لكم وبعد 5 دلال تكون الدلة السادسة مجاناً

انواع القهوه بتكون على حسب اختياركم (هيل, مسمار, زعفران, زنجبيل) علشان تستمعون فيها مع حلوياتهم اللذيذة

حالياً عندهم خدمه توصيل تقدرون تتصلون فيهم وتطلبون اللي يعجبكم 

For Order : 99989824

Twitter @Dallah   Instagram @DallahKuwait

مشكورين وايد بطينية على النقصه اللذيذة عسى الله يوفقكم شغلكم كله نزاكه وذرابه وشغل عدل واحنا بانتظار افتتاح المحل بجمعية كيفان :)

5 comments

  1. q8marronglace says:

    ذقت منهم انواع حلويات عن طريق الاهل و قمت بتصويرها
    و عندي بعض الملاحظات على كل نوع

    المحلبيه كانت نسبه السكر فيها مرتفعه و ماي الزهر طاغي

    الالبه ايضا ماكانت صاكه حتى لما خليناها بالثلاجه حسيتها ماي
    ماني عارف اذا اللون الاصفر اللي فيها كله عباره عن زعفران ولا تم اضافه لون
    لانه اللون حده فاقع و شعرات الزعفران تظهر فقط على سطح الالبه بينما داخل
    لم اشاهد الزعفران والله اعلم

    الكيك كان لذيذ و الهيل اللي فيه طيب بس شويّه كانت دسمه لو يقللون من الزيت
    يكون افضل

    بالنسبه للاسعار نقدر نقول انها معقوله نوعا ما غير ان سعر الكيك حسيته كثير عليه

    بشكل عام الطعم كان لذيذ و اتمنى يأخذون الملاحظات
    بعين الاعتبار عشان تكون النتيجه
    افضل في المرات القادمة

    و بالتوفيق لهم ان شاء الله

Leave a Reply