مـا هو النون ؟ مناسبة تراثية كويتية

النون عاده كويتية من تراثنا يمكن البعض من شباب وشابات هالجيل ما يعرفونها لأنه مو الكل ليلحين يسويها

هالعادة ظريفة وخفيفه والكل يحبها خل اقولكم بالضبط شنو النون

اول شي سبب عمل النون هو تعبير عن الفرحه لمناسبة معينه مثل تسنين الطفل او مشي الطفل او شفاء مريض او غيره من المناسبات السعيدة

اما النون فهو سلة مليئة بالمفرحات من الككاو والحلاو والعلوج والمكسرات اضافه الى الالعاب الصغيرة والاهم قطع الخرده او الفلوس الورقيه

قبل طبعاً كان النون تقليدي حلاو وككاو ومكسرات وفلوس لكن الحين لازم التفنتق شوي 🙂

وطبعاً على حسب المناسبه يحطون الياهل او المره المحتفى فيه بالنص ويقطون عليه النون والناس تلقط من هالاشياء الزينه وتترس جياستهم والمحظوظ اللي يجمع اكبر مبلغ من الفلوس 🙂

وبما اني من عشاق هالعادة ودايماً اذا عندنا نون يخلون مهمة اعداد النون علي استعانت فيني صديقتي اني اروح اشتري معاها الاغراض علشان بتسوي نون بسلامة اختها ورحنا الحمدلله وزهبنا كل شي من محلات حلويات الجملة بشويخ

والله راد ارجع لنفس المكان مره ثانيه علشان صار عندنا مناسبه حلوة وطرى على بالي اسوي بوست عن النون وتشاركوني ذكرياتكم وهم نعلم اللي مايعرف عن هالعادة الكويتية التراثية الحلوة

انا متعودة اذا بسوي نون بكمية كبيرة اشتري من محلات الحلويات اللي بشويخ .. ماعرف اوصف عدل بس لما تروحون الشارع اللي فيه سوق لندن توصلون الدار تاخذونه يمين تلقونهم

محل عالم الحلويات مشاء الله راهي ومرتب وكل شي فيه حتى مطحنه داخله وسلال والزبيل حق النون عنده اشكال والوان واحجام

والعربانه وترسناها من خير الله

والكرتون وحطيناه بالسياره وطيران على البيت قبل لا يذوب الككاو

الحلويات القديمة من الاشياء اللي احرص انها تكون بالنون .. تذكرني بأحلى الايام 🙂

وصار وقت انربط الارباع وحطينا معاهم جراقي صغار مجرمين 🙂

واخر شي احب احط الخردة  .. وهالمره حبيت اسوي شي يديد .. شفتوا البيض الملون ؟ خذيت جم وحده منه وكتبت عليهم ارقام واللي حصلهم كان في جوائز على حسب الرقم اللي حصله 🙂 استانسوا على هالحركة وصار لووووية بعد النون

والنون جاهز

طبعاً انا مجهزته بس بارت التقطط ما اشارك فيه انا احب القط هههههههه ترى مو انا حاطه الارباع علشان جذي ابي القط ينفعون حق مني مناك 😛

احلى شي الخردة من 5 فلوس الى 100 فلس خخخخخخ

لوية النون 🙂

حصيلتي 2,750 فلس 😀

من الاشياء اللي استانسوا عليهم اليهال هالبالونات وماخذتهم بعد من الشويخ علبالي علوج طلعوا بالونات ميني حدهم يشوقون وانواع

هذا اهوو النون وعساها عادة ماتنقطع ولا تندثر والحمدلله على سلامة الغالي والغاليه وقرت عينا فيهم 🙂

8 comments

  1. Habo0osH says:

    عليكم بالعاااااافيه خوش نووون

    ابشرج انا للحين ما ابطل نون واخر واحد بمناسبه فلعه بنت اخوي بعد قلبي 

  2. bnt jaber Blog says:

    الحمدلله ع سلامة غاليكم ومثل ما قلتي عادة ان شالله ما تنقطع وبخصوص عالم الحلويات الحمدلله موجود عندنا بالفحيحيل بدال لا اطق درب لين الشويخ وااااااي مسافرة لوووول

  3. سارونة says:

    واي واي هالمحل انا من عشاقة وبصراحة شغله مميز وعارف حق الكويتيتن يعرف للنون واصلا بدون ما تقوليله من نفسه يعرف انج يايه تشترين حق النون ويزهب الاجياس وبصراحة شغله نظيف ومرتب وكلشي جديد عنده

    خوش نون بس مرة ثانية سوس مثلي خشي الفلوس داخل الحلاه ولزقية اشلون شفتي مثل كاكاو موفيه فتحة على جوانب مالت القرطاس اهنية بالفجة صفطي الفلوس وحطيهم وعقبها راح يقولولج ماكو فلوس وليما تقولين لهم انه مخشوشين تعالي شوفيهم ليما ينثرون النون ويدورن اهنية متعة ثانية

Comments are closed.