وصلتني دعوه من شركة الصفاة الغذائيه من اسبوع تقريباً لزيارة المطعم الايطالي دون ماريوز
امس كان الجو بالليل حلو فقررنا نروح نتعشى في دون ماريوز .. حبيت المكان اول مره اروح صوب الضيافه فلج يم الابراج
الضيافه فلج عباره عن 3 مطاعم على البحر دون ماريوز – ليالي الخيام و شرمبي
دخلنا المطعم وكان هادي وااااايد ومكانه حده حلوو على البحر مباشره 
التراس اللي برا بيفتحونه قريب وبتصير قعده للشتا والجو الحلو 
المنيو
منيوهم باللغتين العربية والانجليزية ومنوع واسعارهم حلوة
بعدها ياتنا الويتر تاخذ طلباتنا
مشاء الله خدمتهم وايد سريعه وقاعدين فوق راسنا بس ينطرونا نأشر وهذا الشي لاحظته مو بس لي لكل الزباين اللي كانوا موجودين
ضيفونا بهالطبق اللي اعيز اقول لذيذ .. خبز بالثوم يقدم مع الطماط وصلصة الزيتون
عصايرهم فريش وطلبت منهم ثلج مبروش مع البرتقال ويابوه مثل ما طلبته مع ان وايد مطاعم ترفض تقديم البرتقال مع الثلج المبروش وتكتفي بتقديم مكعبات الثلج اللي مع الاسف ما احبها واحس انها ماتبرد العصاير بس تزيد الماي فيها على الفاضي
اول شي بدينا بالشوربة واسمها كريما دي فونجي (شوربة فطر) وايد وايد لذيذة وحاااره
سعرها 2,250 دك 
عندهم انواع من السلطات اخترنا منها سلطة اسمها دي ميلانو
مكوناتها عباره عن خس, بيبي ذره, طماط, دياي مشوي, جبن البارميزان
ويقدمون معاها صلصة البلسميك
سعرها 2,600 دك
السلطة لذيذة وخفيفة 
المقبلات
موزاريلا فريتي
اصابع الموزاريلا المقليه وصلصة المارينارا
بالنسبة لي ما حبيتها كانت يابسة شوي والجبن المفروض يكون سايح داخلها يمكن قالينها وايد لين يبست حسافه عاد الصلصة لذيذة
سعرها 2,750 دك
تريو بروسكتا
وهي تشكيله من الخبز المحمص مغطى بثلاث انواع من التوبينق طماط وجبن وزيتون وتقدم مع الثوم المشوي وايد احبه لذيذ مع الخبز
سعرها 1,700 دك
وصلنا للاطباق الرئيسية
اول طبق كان فيتوجيني بورشيني
بيني باستا بالصلصة البيضا والفطر والدياي .. وايد لذيذة انصح وبشده
سعرها 3,750 دك
يم يم
ملحقات البيتزا وصلت وناطرين البيتزا يمي
بيتزا دي مانزو
مكوناتها صلصة طماط مع الفلفل الاخضر والفطر وجبن الموزاريلا واللحم المفروم
وايد خفيفة ولذيذة وتقدم حااااره من الفرن لي الطاولة على طوووووول
سعرها 3,250 دك
بعد هالعشا اللذيذ قدمولنا الفوط الساخنة منعشـــــــــــــــة
وقدمولنا كوب صغير قالت لنا انه يهضم وهو عباره عن عصير البرتقال والليمون مع ماي الورد .. كان ناطع 
وكالعاده ختامها حلووو
كيكة الفوندان مع ايس كريم الفانيلا
سعرها 1,750 دك
كانت واو واو واو وااايد لذيذة ترفة وفريش رفيجتي غيبت عليها 
مع اني مو من ربع التيراميسو بس لما ذقته في دون ماريوز حبيته وايد لذيذ وريحته تدوخ .. تهقون لأني صايرة من محبين القهوة ؟
سعره 1,750 دك
شلون نطلع وماخذينا جولة بالمطعم وتعرفنا على شيف البيتزا اللذيذة .. الفرن موجود جدام الكل وتقدرون تشوفونه يسوي بيتزتكم جدامكم 
الفرن حاااار والاخشاب اللي داخله اييبونها مخصوص من لبنان 
صورة جماعية لستاف مطعم دون ماريوز النشيطين
كل الشكر لشركة الصفاة الغذائية والاخت عليا مصطفى على الدعوة ولمدير المطعم الاخ يحيي محمود على حسن استقباله
Don Mario’s Ristorante is located in Dhiafa Village on Arabian Gulf Road next to Aqua Park
Tel : 22475986/7
FB Link
حرام عليج يوعتيني ، ردتي الديرة بعد اسبوعين ان شاء الله . بالعافية عليج
بالسلامة ان شاء الله .. الله يعافيك 🙂
انا كنت امر عليه بس كلش كلش ماتوقعته جذي !!! نروح ونجرب الطعم وبيني وبينج ملينه من المطاعم الموجودة والتكرار نبي نغير , شكـــرا على البوست
WOW, Looks YuMmy…
yes it is 🙂
يمييييي انا مجربته بس ما جربت ولا شي من اللي طلبتيه ماعدا الشوربة
الشوربة وايد لذيذة كانت
YUMMY il molten shakla khayalllllll
ee shayo5a ‘3ayebaat feha 😛
انا جربتو وبعرف المطعم كويس صراحة اكلو يجنن والحلو عندهم اكثر من رائع وخصوصا الترمسو بجد جربوه مش هتندمو ابد وبالف هنا على كل اللي هيروح
جوعتونى الله يسامحكم :)))))))))
حلوه موووووووووووت الصور .. تسلم الايادى 🙂
الله يسلمكم 🙂
Comments are closed.